सध्या देशात एका लग्नाची जोरदार चर्चा रंगलीय, ते लग्न म्हणजे, साऊथ सुपरस्टार रश्मिका मंदाना आणि विजय देवरकोंडा. दोघेही आज म्हणजे २६ फेब्रुवारी रोजी उदयपूर इथे लग्नबंधनात अडकणार आहेत. या दोघांच्या लग्नासोहळ्यासाठी चाहतेही उत्सुक आहेत. सध्या रश्मिका आणि विजय यांच्या लग्नापूर्वीच्या सोहळ्यांना सुरुवात झाली आहे. त्यांच्या लग्नाची थीम 'प्राइमल' असणार आहे. पारंपरिक आणि अगदी साध्या पद्धतीने हा सोहळा पार पडणार आहे.

लग्नाची थीम 'प्राइमल'

विजय देवरकोंडा आणि रश्मिका या सुपरस्टार जोडीच्या लग्नाला फक्त कुटुंब आणि जवळचे मित्र उपस्थित राहणार असल्याचे वृत्त आहे. लग्नाचे ठिकाण राजेशाही आहे आणि लग्नाच्या थीमपासून ते स्टाईलपर्यंत सर्व काही साधे आणि स्टायलिश असणार आहे. विजय देवरकोंडाने त्याच्या इंस्टाग्रामवर याची एक झलक देखील शेअर केली आहे.

दोन पारंपरिक पद्धतीत लग्न पार पडणार

तेलुगू आणि कोडावा या दोन्ही संस्कृतींचा आदर करत दोन वेगवेगळ्या प्रथेप्रमाणे 'विरोश' यांचे विधी पार पडणार आहेत. 'विरोश' यांच्या लग्नाच्या विधींची सुरुवात विजय देवरकोंडाच्या पारंपारिक तेलुगू हिंदू विधींनुसार होणार आहे. हा सोहळा सकाळी ८ वाजता सुरु होईल. त्यानंतर संध्याकाळी कोडावा समारंभ होईल, ज्यामध्ये रश्मिका मंदानाच्या कुटुंबियांच्या परंपरेने चालत आलेल्या विधी होणार आहेत.

विजय आणि रश्मिकाचा प्रवास २०१८ मध्ये गीता गोविंदम या रोमँटिक ड्रामाच्या सेटवर सुरू झाला, जो बॉक्स ऑफिसवर सुपर हिट ठरला. चित्रपटाच्या यशामुळे ते तेलुगू चित्रपटसृष्टीतील सर्वात आवडत्या ऑनस्क्रीन जोड्यांपैकी एक बनले. त्यानंतर ही जोडी 'डिअर कॉम्रेड' साठी पुन्हा एकत्र दिसली. ज्यामुळे त्यांची लोकप्रियता वाढली. त्यांच्या अभिनयाने करोडो चाहत्यांची मने जिंकली. अशा या जोडीचे आज मोठ्या थाटामाटात उदयपूर येथे लग्नसोहळा पार पडतो आहे.