बॉक्स ऑफिसवर 'धुरंधर २'चा बोलबाला असताना आता रितेश भाऊंनी मोठा धमाका केला आहे. रितेश देशमुखच्या 'राजा शिवाजी' चित्रपटाचा दमदार टीझर समोर आला आहे. आता सोशल मीडियावर फक्त रितेश भाऊंच्या 'राजा शिवाजी' चित्रपटाची चर्चा पाहायला मिळत आहे. हातात तलवार घेऊन स्वातंत्र्यासाठी लढताना रितेश देशमुख छत्रपती शिवाजी महाराजांच्या भूमिकेत दिसणार आहे. 'राजा शिवाजी' चित्रपटातून छत्रपती शिवाजी महाराजांची शौर्यगाथा सांगितली जाणार आहे. 'राजा शिवाजी' चा टीझर पहिल्यांदा 'धुरंधर २'च्या स्क्रीनिंगदरम्यान थिएटरमध्ये प्रदर्शित करण्यात आला होता.

टिझरचे हटके कॅप्शन

"हे हिंदवी स्वराज्य व्हावे, ही तर श्रींची इच्छा!!!

दहा वर्षे एका महाकाय स्वप्नाला उराशी बाळगून ते सत्यात उतरवण्याचा प्रयत्न केला. लक्षात आलं. छत्रपती शिवाजी महाराज नावाचं हे आकाश जितकं दिसतं त्यापेक्षा कितीतरी भव्य आहे. आम्ही पाहिलेल्या स्वप्नाची पहिली झलक तुमच्यासमोर ठेवताना मला अभिमान वाटतो आहे. आपला राजा, आपला अभिमान. आई जगदंबेचं स्मरण करून मोहिमेचा पहिला भंडारा उधळत आहे.

हर हर महादेव."

टीझरच्या कमेंट्स

'राजा शिवाजी'च्या टीझरवर नेटकरी भरभरून कमेंट्स करत आहे. रितेश देशमुखला छत्रपती शिवाजी महाराजांच्या भूमिकेत पाहून चाहते भारावून गेले आहेत. नेटकरी कमेंट्स करता की, "जय शिवराय", "पाहताच अंगावर आला काटा", "मराठ्यांचा इतिहास संगीतने आणि दमदार अभिनयाने पुन्हा मना-मनात जिवंत जागा होईल. हर हर महादेव..."," जय जिजाऊ जय शिवराय जय शंभूराजे, छत्रपती शिवाजी महाराजांच्या मातृभाषेतच चित्रपट पहावा, कारण खरा इतिहास मराठीतूनच घडला आहे !", "जबरदस्त भाऊ...मराठी मधील भारी वाटतोय, सरळ हृदयात..."

'राजा शिवाजी' स्टार कास्ट

'राजा शिवाजी' चित्रपटात रितेश देशमुख आणि जेनेलियासोबतच आणखी तगडी स्टार कास्ट पाहायला मिळत आहे. यात संजय दत्त, अभिषेक बच्चन, महेश मांजरेकर, सचिन खेडेकर, भाग्यश्री, फरदीन खान, जितेंद्र जोशी, अमोल गुप्ते, विद्या बालन हे दिग्गज कलाकार झळकले आहेत. रितेश देशमुख छत्रपती शिवाजी महाराजांची भूमिका साकारणार आहे. तर, त्याची पत्नी जेनेलिया देशमुख सईबाईंच्या भूमिकेत झळकणार आहे. महेश मांजरेकर शहाजीराजे भोसले यांची भूमिका साकारणार आहे. तर राजमाता जिजाऊंच्या भूमिकेत अभिनेत्री भाग्यश्री दिसणार आहेत. अभिषेक बच्चन संभाजीराजे शहाजीराजे भोसले यांच्या भूमिकेत झळकताना दिसेल.

'राजा शिवाजी' रिलीज डेट

'राजा शिवाजी' चित्रपटातील गाण्यांना अजय-अतुलने संगीत दिले आहे. 'राजा शिवाजी' हा भव्य चित्रपट १ मे २०२६ रोजी थिएटरमध्ये रिलीज होणार आहे. हा चित्रपट मराठी, हिंदी आणि तेलुगू भाषांमध्ये प्रदर्शित होणार आहे.