Boys 4 Movie:

ढुंग्या, धैऱ्या आणि कबीर हे त्रिकुट पुन्हा प्रेक्षकांना खळखळून हसवण्यासाठी सज्ज झाले आहे. ‘बॉईज’, ‘बॉईज २’ आणि ‘बॉईज ३’नंतर लवकरच ‘बॉईज ४’ (Boys 4 Movie) प्रेक्षकांच्या भेटीला येणार आहे. या चित्रपटाची प्रेक्षक आतुरतेने वाट पाहत आहेत. या चित्रपटाच्या टीझरनंतर आता पहिलं गाणं प्रेक्षकांच्या भेटीला आले आहे. हे गाणं खुद्द ढुंग्या, धैऱ्या आणि कबीर यांनी गायलं आहे. या गाण्याच्या माध्यमातून पार्थ भालेराव, प्रतीक लाड, सुमंत शिंदे यांनी अभिनयानंतर आता गायन क्षेत्रात पाऊल ठेवलं आहे. त्यांच्या चित्रपटाचं हे पहिलं गाणं प्रेक्षकांच्या पसंतीस पडले आहे.

'बॉईज'च्या सर्व भागांना अवघ्या महाराष्ट्रातून प्रेम मिळाले. धैर्या, ढुंग्या आणि कबीर हे त्रिकुट आता चौपट धमाल घेऊन 'बॉईज ४'च्या माध्यमातून आपल्या भेटीला येणार आहेत. नुकतेच या चित्रपटातील 'टायटल सॉन्ग' रिलीज करण्यात आले. प्रत्येकाला थिरकायला लावणारे हे रॅप सॉन्ग अवधूत गुप्ते यांच्यासह प्रतीक लाड, सुमंत शिंदे आणि पार्थ भालेराव यांनी गायले आहे. त्यामुळे या गाण्याच्या निमित्ताने आता हे त्रिकुट गायकही बनले आहे.

अवधूत गुप्ते यांचे जबरदस्त संगीत लाभलेल्या या गाण्याला हृषिकेश कोळी यांनी शब्दबद्ध केले आहे. यापूर्वीही बॉईजच्या प्रत्येक भागातील गाण्यांनी संगीतप्रेमींना अक्षरश: वेड लावले होते. आता हे टायटल सॉन्गही तरुणाईला भुरळ घालत असल्याचे चित्र पाहायला मिळत आहे. धैर्या, ढुंग्या आणि कबीर या गाण्यातही धमाल करताना दिसत आहे. या गाण्यातून त्यांचा अनोखा स्वॅग सर्वांना पाहायला मिळत आहे. हे जबरदस्त गाणं पाहिल्यानंतर प्रेक्षक चित्रपट रिलीज होण्याची वाट पाहत आहेत.

दरम्यान, सुप्रीम मोशन पिक्चर्स प्रा. लि. प्रोडक्शन अंतर्गत एव्हरेस्ट एंटरटेनमेंटसह अवधूत गुप्ते प्रस्तुत या चित्रपटाचे लालासाहेब शिंदे, राजेंद्र शिंदे, संजय छाब्रिया यांनी निर्मिती केली आहे. विशाल सखाराम देवरूखकर यांनी या चित्रपटाचे दिग्दर्शन केले आहे. तर हृषिकेश कोळी यांनी या चित्रपटाची कथा लिहिली आहे. २० ऑक्टोबरला हा चित्रपट प्रदर्शित होणार आहे. या चित्रपटात सुमंत शिंदे, पार्थ भालेराव, प्रतिक लाड, ऋतिका श्रोत्री, अभिनय बेर्डे, निखील बने, गौरव मोरे, रितुजा शिंदे, जुई बेंडखळे, गिरीष कुलकर्णी, यतीन कार्येकर, समीर धर्माधिकारी आणि ओम पाटील हे मुख्य भूमिकेत आहेत.