Sunil Holkar: मराठी चित्रपटसृष्टी आणि हिंदी टीव्ही मालिकांमधून आपल्या अभिनयाची छाप सोडणारा अभिनेता सुनील होळकर याचे आज (शुक्रवारी) निधन झाले. त्याच्या निधनाचे कारण अद्याप तरी अस्पष्ट आहे. त्याच्या निधनाचे वृत्त ऐकून चाहत्यांना मोठा धक्का बसला आहे. सुनीलच्या निधनाचे वृत्त कळताच त्याच्या चाहत्यांकडून सोशल मीडियाच्या माध्यमातून श्रद्धांजली वाहण्यात येत आहे.

सुनिल लिव्हर सोरायसिस या गंभीर आजाराने त्रस्त होता. त्याच्यावर अनेक उपचार करूनही प्रकृतीत कोणतीच सुधारणा झालेली नव्हती. त्याची आज (शुक्रवारी) दुपारी प्राणज्योत मालवली.

'गोष्ट एका पैठणीची', 'मोरया' या सारख्या अनेक चित्रपटांतून सुनीलने आपल्या अभिनयाची चमक दाखवली. सुनीलने हिंदी टेलिव्हिजनवरील सर्वाधिक लोकप्रिय मालिका 'तारक मेहता का उल्टा चष्मा' सोबतच 'मॅडम सर', 'मि. योगी' अशा अनेक मालिकांतून तर 'भुताटलेला' या वेबसीरीजमधून आपल्या अभिनयाची छाप प्रेक्षकांमध्ये सोडली.

अशोक हांडे यांच्या चौरंग नाट्य संस्थेत त्याने बरीच वर्षे काम केलं. अभिनेता, निवेदक अशी त्याची ख्याती होती. जवळपास 15 वर्षांहून अधिक काळ त्याने रंगभूमीत काम केले.