मराठी अभिनेते शरद पोंक्षे कायमच आपल्या उत्तम अभिनयासाठी ओळखले जातात. आजवरच्या करिअरमध्ये त्यांनी अनेक चित्रपट, मालिका आणि नाटकांमध्ये काम केले आहे. त्यांची अनेक नाटक आणि मालिका गाजल्या आहेत. त्यांची बोलण्याची रोखठोक शैली कायमच प्रेक्षकांना भुरळ घालते. सध्या शरद पोंक्षे यांचा एक व्हिडीओ सोशल मीडियावर तुफान व्हायरल होत आहे.

अभिनेते शरद पोंक्षे यांच्या 'पुरुष' नाटकाचा प्रयोग सुरू असताना चक्क शरद पोंक्षे संवाद विसरले. हा प्रसंग श्रुती आगाशे हिने सोशल मीडियावर व्हिडीओ शेअर करून सांगितला आहे. नाटकाचे संवाद विसरल्यानंतर शरद पोंक्षे यांनी प्रेक्षकांना थोडा वेळ मागितला. मात्र थोड्या वेळाने नाटकाचा प्रयोग रद्द करण्यात आला.

सोशल मीडियावर शेअर झालेल्या व्हिडीओनुसार, शरद पोंक्षे यांनी संवाद विसरल्यावर थेट प्रेक्षकांना सांगितले की, "रसिकहो मी ब्लँक झालो आहे. मला काहीच आठवत नाही. मला थोडा वेळ द्याल का?"शरद पोंक्षे यांच्या विनंतीचा मान राखून प्रेक्षकांनी टाळ्यांचा गजर केला. नाटकाचा प्रयोग पार न पडल्यामुळे आणि नाटका दरम्यान संवाद विसरल्यामुळे शरद पोंक्षे भावुक झाले. त्यांना प्रेक्षकांशी संवाद साधताना रडू अनावर झाले. ते म्हणाले की, "माझ्या 40 वर्षांच्या कारकि‍र्दीत असे पहिल्यांदाच झाले आहे"

नाटक पाहायला आलेल्या प्रेक्षकांनी हा प्रसंग घडल्यावर कोणताही आरडाओरडा न करता शरद पोंक्षे यांच्या भावना समजून घेऊन त्यांना पाठिंबा दिला. कोणतीही तक्रार केली नाही. 'पुरुष' हे नाटक स्त्री-पुरुष संबंधांवर आधारित आहे. जयवंत दळवी यांनी 'पुरुष' नाटक लिहिले आहे. शरद पोंक्षे हे या नाटकात मुख्य भूमिकेत आहेत.