मराठमोळा अभिनेता चिन्मय मांडलेकर (Chinmay Mandlekar)सध्या खूप चर्चेत आहे. चिन्मय मांडलेकरच्या मुलाच्या नावावरुन सोशल मीडियावर प्रचंड ट्रोल करण्यात आले आहे. त्यामुळे त्याने छत्रपती शिवाजी महाराजांची भूमिका कधीच साकारणार नसल्याचे जाहीर केले आहे. चिन्मय मांडलेकरच्या या निर्णयावर चित्रपटसृष्टीतून अनेक प्रतिक्रिया येत आहेत. यावर अभिनेता पुष्कर श्रोत्रीनेदेखील (Pushkar Shotri) आपले मत मांडले आहे.

पुष्कर श्रोत्रीने माध्यमांना सांगितले की, 'चिन्मय मांडलेकरने त्याच्या मुलाचे नाव जहांगीर ठेवले म्हणून तो त्याच्यावर वेगळे संस्कार करतोय का? तो भारतीय संस्कृतीचेच संस्कार करतोय, आजच्या परिस्थितीचा विचार करुन तो आपल्या मुलाचे संगोपन करत करतोय, त्याला वाईट गोष्टीपासून लांब राहण्यास शिकवतोय, चांगल्या गोष्टी शिकवतोय, मग मुलाच्या नावाने काय फरक पडतो?'

'तुम्ही एखाद्या मुलाला त्याच्या नावावरुन ट्रोल करणार असाल तर तुम्हाला इतिहास माहितीये का? जहांगीर नाव ठेवण्यामागचे कारण त्याने आधीच सांगितले होते. तुम्ही जरा इतिहास बघा, हिम्मत असेल तर खरा चेहरा घेऊन समोर या. तुम्ही खोटी नावं, खोटी अकाउंट्स बनवून ट्रोल करणार... तुम्हाला किती महत्त्व द्याचं?', असं पुष्कर श्रोत्रीने म्हटलं आहे.

चिन्मय मांडलेकरने छत्रपती शिवाजी महाराजांची भूमिका यापुढे कधीही करणार नसल्याचा निर्णय घेतला आहे. त्याच्या या निर्णयामुळे चाहत्यांना मोठा धक्का बसला आहे. चिन्मय मांडलेकरच्या या निर्णयाबाबत मराठी चित्रपटसृष्टीतून अनेक प्रतिक्रिया येत आहेत.