मराठी सिनेसृष्टीतील लोकप्रिय कलाकार सिद्धार्थ जाधव आणि मकरंद अनासपुरे यांचा 'एक डाव भुताचा' हा चित्रपट लवकरच प्रेक्षकांच्या भेटीला येणार आहे. चित्रपटाचं पोस्टर रिलीज झाल्यापासून प्रेक्षकांना चित्रपटाविषयीची उत्सुकता लागली आहे. नुकतंच चित्रपटातील पहिलं गाणं रिलीज झालं आहे. सिद्धार्थचा हटके अंदाज या गाण्यात पाहायला मिळतोय.

सध्या सोशल मीडियावर रिलीज झालेल्या या गाण्याची चर्चा आहे. एक डाव भुताचा चित्रपटातील पहिलं गाणं देखणं पाखरू हे रिलीज झालं आहे. सिद्धार्थ आणि मयूरी यांच्या केमेस्ट्रीने सर्वांचेच लक्ष वेधून घेतले आहे. गावरान स्टाईलमध्ये निसर्गाच्या सानिध्यात या गाण्याचं शूट करण्यात आलं आहे. हे सुप्रसिद्ध गाणं सोनू निगम यांनी गायले आहे.

चित्रपटाची कथा

स्मशानात जन्म झाल्यानं सतत भूत दिसणाऱ्या तरुणाची कथा "एक डाव भुताचा" या चित्रपटात दाखवण्यात येणार आहे. या तरुणाची भूमिका अभिनेता सिद्धार्थ जाधव साकारतोय, तर मकरंद अनासपूरे भूताच्या भूमिकेत आहेत. माणूस आणि भुताच्या नात्याची रंगतदार गोष्टीला प्रेमकहाणीचा तडकाही आहे.

कधी होणार चित्रपट रिलीज

माणूस आणि भुताच्या नात्याची गोष्ट सांगणारा हा विनोदी चित्रपट आहे. चित्रपटाचं टिझर पाहिल्यानंतर प्रेक्षकांचे लक्ष चित्रपटांकडे लागले आहे.चित्रपटात सिद्धार्थ जाधव, मकरंद अनासपुरेसह अक्षय कुलकर्णी, हर्षद नायबळ, मयूरी देशमुख, अश्विनी कुलकर्णी, नंदिनी वेद्य, हे देखील मुख्य भूमिकेत आहेत. 'एक डाव भुताचा' हा चित्रपट ४ ऑक्टोबरला थिएटरमध्ये प्रदर्शित होणार आहे.