सध्या 'लग्नानंतर होईलच प्रेम' (Lagnanantar Hoilach Prem) मालिका रंजक वळणावर आली आहे. जीवा-नंदिनीला आणि काव्या-पार्थला मनवण्याचा प्रयत्न करत आहेत. यांच्या नात्यात आलेला दुरावा कसा मिटणार, हे पाहणे मालिकेत महत्त्वाचे ठरणार आहे. गेल्या काही दिवसांपासून मालिकेत जीवा नंदिनीचे मन जिंकण्याचा प्रयत्न करत आहे. तो तिच्यासाठी ऑम्लेट बनवतो. रिक्षावाला देखील बनतो. पण नंदिनीचा राग काही जात नाही.

दुसरीकडे काव्या पार्थचे मन जिंकण्यासाठी त्याला त्रास देते. त्याच्या गाडीची हवा काढून त्याच्यासाठी रिक्षा घेऊन येते. मात्र पार्थ उलटा तिच्यावर भडकतो. आता या मालिकेचा नवीन प्रोमो समोर आला आहे. नवीन प्रोमोमध्ये नंदिनी आणि जीवा समुद्रकिनारी पावसात भिजताना दिसत आहेत. जीवा नंदिनीला म्हणतो की,"तुझं प्रेम वेड मला उशीरा कळलं थोड, सोडवूया का जरा आपल्या नात्याचं कोड"

जीवाला उत्तर देत नंदिनी म्हणत की, "आज रात्री माझ्याबरोबर डिनरला याल?" हे ऐकताच जीवाला खूप आनंद होतो. ते दोघे एकमेकांकडे पाहत राहतात. तर दुसरीकडे घरी काव्या पार्थला म्हणते की, "तुम्ही मला या नात्याच्या पलीकडे भेटला असता तर खूप छान जुळलं असत आपलं" तिच्या डोळ्यात पाणी येते. यावर उत्तर देत पार्थ काव्याला विचारतो की, तुम्ही माझ्याबरोबर आज रात्री लाँग ड्राईव्हला याल का?" हे ऐकताच काव्याची कळी खुलते.

जीवा-नंदिनी आणि काव्या-पार्थ घटस्फोट घेऊन वेगळे होणार की आपल्या नात्याला दुसरी संधी देणार हे पाहणे महत्त्वाचे ठरणार आहे. 'लग्नानंतर होईलच प्रेम' मालिक स्टार प्रवाह वाहिनीवर संध्याकाळी 7.00 वाजता पाहायला मिळते.