Karan Johar moves Delhi High Court: गेल्या काही वर्षांत, एआय आणि इतर तंत्रज्ञानामुळे, एकीकडे लोकांसाठी सुविधा वाढल्या आहेत. तर, दुसरीकडे त्याचा गैरवापर होण्याचा धोकाही वाढला आहे. अलिकडेच, बच्चन कुटुंबाने त्यांच्या व्यक्तिमत्त्वाच्या हक्कांच्या संरक्षणासाठी न्यायालयाचा दरवाजा ठोठावला होता. आता बॉलिवूड चित्रपटांचा मोठा निर्माता करण जोहरनेही दिल्ली उच्च न्यायालयात धाव घेतली आहे. त्यांच्या व्यक्तिमत्त्वाच्या हक्कांचे संरक्षण करण्यासाठी न्यायालयाला त्याने अर्ज दाखल केले आहेत.

निर्मात्याची मागणी काय आहे?

बॉलिवूड निर्माता करण जोहरने त्याच्या व्यक्तिमत्त्वाच्या हक्कांचे संरक्षण करण्यासाठी दिल्ली उच्च न्यायालयात याचिका दाखल केली आहे. करणने सोमवारी दिल्ली उच्च न्यायालयात त्याच्या ओळख आणि प्रसिद्धीच्या अधिकारांचे संरक्षण करण्याची मागणी केली. करण जोहरच्या वतीने वकील राजशेखर राव म्हणाले की, त्याच्या व्यक्तिमत्त्वाचा, चेहरा, आवाजाचा आणि लोकप्रियतेचा कोणीही अनधिकृतपणे गैरवापर करू नये याची खात्री करण्याचा त्यांना अधिकार आहे.

करण जोहरचा असा विश्वास आहे की त्याची ओळख आणि लोकप्रियतेचा लोक स्वतःच्या फायद्यासाठी वापर करत आहेत. हे खूप धोकादायक ठरू शकते. याशिवाय, करणने न्यायालयाला विनंती केली की काही वेबसाइट्स आणि सोशल मीडिया प्लॅटफॉर्मना त्याचे नाव आणि चित्र असलेल्या उत्पादनांची बेकायदेशीर विक्री थांबवण्यास सांगावे. तसेच त्याचा अपमान होईल असे मीम्स तयार करण्यावर रोख लावावा.

या प्रकरणावर न्यायाधीशांनी काय म्हटले?

करण जोहरच्या या याचिकेवर न्यायमूर्ती मनमीत प्रीतम सिंह म्हणाले की, राव, तुम्हाला दोन गोष्टी समजून घ्याव्या लागतील. पहिली म्हणजे अवमान, जो मीम्सपेक्षा वेगळा आहे. प्रत्येक मीम्स अपमानजनक असणे आवश्यक नाही. दुसरा मुद्दा म्हणजे लोक तुमच्या नावाने वस्तू विकत आहेत. ते तुमचे डोमेन नाव आहे का? तुम्ही ते विशेषतः चिन्हांकित केलं आहे का? त्यानंतर न्यायालय या प्रकरणाची दखल घेईल. तसेच, असे होऊ शकत नाही की तुमच्या नावाच्या प्रत्येक मीम्स किंवा फोटो वापरण्याचा उद्देश अपमान करणेच असेल.

या स्टार्सनीही कारवाई केली आहे

बॉलिवूड स्टार्सचे चाहते कोट्यवधींमध्ये आहेत. त्यांना त्यांच्या व्यक्तिमत्त्वाचे आणि त्याच्या लोकप्रियतेचे गैरवापर होण्यापासून संरक्षण करण्याचा पूर्ण अधिकार आहे. गेल्या काही वर्षांत, असे अनेक प्रकरणे समोर आली आहेत ज्यात कलाकारांना या समस्येचा सामना करावा लागला आहे आणि त्यांना न्यायालयाचे दार ठोठावावे लागले आहे. अलीकडेच, या यादीत बच्चन कुटुंबाचे नाव जोडले गेले आहे. याशिवाय अनिल कपूर आणि जॅकी श्रॉफ सारख्या अभिनेत्यांनीही याप्रकरणी न्यायालयाची मदत घेतली होती.