अखंड महाराष्ट्राचं दैवत असलेल्या छत्रपती शिवाजी महाराजांची यशोगाथा सर्वदूर पसरली आहे. महाराजांचा इतिहास घरोघरी पोहचवण्यासाठी अनेक इतिहास प्रेमी आणि मनोरंजन क्षेत्रातील अभिनेते, दिग्दर्शक पुढे येत आहेत. अशातच आता 'खालिद का शिवाजी’ हा मराठी चित्रपट प्रदर्शित होण्यापूर्वीच मोठ्या वादाला सामोरे जात आहे. या चित्रपटात छत्रपती शिवाजी महाराजांच्या संदर्भात काही वादग्रस्त मांडणी असल्याचा आरोप करत हिंदू महासंघाने चित्रपटावर तात्काळ बंदी घालण्याची मागणी केली आहे. त्यांनी यासाठी सेन्सॉर बोर्ड आणि चित्रपट निर्मात्याला पत्र पाठवले असून, जर बंदी घातली नाही, तर ज्या ठिकाणी हा चित्रपट प्रदर्शित होईल तिथे आंदोलन करण्याचा इशारा दिला आहे.

चित्रपट 8 ऑगस्ट रोजी प्रदर्शित होणार असून, विशेष म्हणजे कान्स फिल्म फेस्टिव्हलसाठी या चित्रपटाची निवड झाल्याचे निर्मात्यांनी जाहीर केले आहे. मात्र, त्याआधीच हिंदुत्ववादी संघटनांचा आक्रोश सुरु झाला आहे. हिंदू महासंघाचे अनंद दवे यांनी आरोप केला आहे की, या चित्रपटात शिवाजी महाराजांचा खोटा इतिहास मांडला गेला असून, त्यांचे विकृतीकरण करण्यात आले आहे.

दवे यांच्या मते, चित्रपटात शिवाजी महाराजांना धर्मनिरपेक्षतेच्या अनुषंगाने दाखवण्याचा प्रयत्न केला गेला आहे, जो इतिहासाच्या सत्यतेशी फारकत घेणारा आहे. “शिवाजी महाराज हे हिंदवी स्वराज्याचे स्थापक होते, त्यांचे खरे दर्शन जनतेला व्हायला हवे. पण या चित्रपटात त्यांच्या विचारांची दिशाभूल करणारी भूमिका दिसते,” असे दवे यांनी सांगितले.

आनंद दवे यांनी स्पष्ट शब्दांत सांगितले की, “हा केवळ चित्रपट नसून आमच्या श्रद्धेवर आघात आहे. जर हा चित्रपट प्रदर्शित करण्यात आला, तर आम्ही शांत बसणार नाही. महाराष्ट्रातील कोणत्याही थिएटरमध्ये चित्रपट लावला गेला, तर तीव्र आंदोलन करण्यात येईल.” दरम्यान, या चित्रपटाच्या निर्मात्यांनी अद्याप या आरोपांवर अधिकृत प्रतिक्रिया दिलेली नाही. मात्र, वाद वाढत असल्याने प्रशासन आणि सेन्सॉर बोर्डाला या प्रकरणाची दखल घ्यावी लागणार आहे. चित्रपटावर बंदी येते की तो नियोजित वेळेत प्रदर्शित होतो, हे पाहणे महत्त्वाचे ठरणार आहे.