बॉलिवूडचा ॲक्शन हिरो जॉन अब्राहम (John Abraham ) आता 'फोर्स 3' ( Force 3) चित्रटातून प्रेक्षकांच्या भेटीला येत आहे. या चित्रपटाच्या शूटिंगला सुरूवात झाली आहे. या चित्रटात बॉलिवूडचा स्टार कलाकार झळकणार आहे. हा अभिनेता दुसरा-तिसरा कोणी नसून 'सनम तेरी कसम' फेम हर्षवर्धन राणे (Harshvardhan Rane) आहे. 'फोर्स 3'मध्ये जॉन अब्राहमसोबत हर्षवर्धन राणे झळकणार आहे, ज्यामुळे सिनेमात अ‍ॅक्शनचा डबल डोस पाहायला मिळणार आहे.

'फोर्स 3' चित्रपटात मुख्य भूमिकेत अभिनेत्री तान्या मानिकतला झळकणर आहे. नुकताच हर्षवर्धन राणेने सोशल मीडियावर एक व्हिडीओ शेअर केला आहे. ज्यात चित्रपटाच्या पारंपरिक मुहूर्त पूजा समारंभ पाहायला मिळत आहे. व्हिडीओमध्ये हर्षवर्धन शूटिंग सेटवर पूजा करताना दिसत आहे. तान्या माणिकतला देखील हात जोडून मागे उभी असल्याचे दिसून येत आहे. त्याने कॅप्शनमध्ये लिहिले की, "FORCE 3 आमच्यासोबत असो..."

'फोर्स 3' चे दिग्दर्शन भाव धुलिया आणि लेखन सिंहाब हाश्मी यांनी केले आहे. 'फोर्स 3'चे पहिले शेड्यूल गुजरातमध्ये होत आहे. 'फोर्स' फ्रँचायझीचा 'फोर्स 3' हा तिसरा भाग आहे. 'फोर्स' 2011 मध्ये प्रदर्शित झाला. त्यानंतर 'फोर्स 2' चित्रपट 2016 ला रिलीज झाला. आता 'फोर्स 3' चित्रपट 2027 ला रिलीज होणार असल्याचे बोले जात आहे. या चित्रपटात जॉन अब्राहम एसीपी यशवर्धनच्या भूमिकेत दिसणार आहे.

हर्षवर्धन राणे वर्कफ्रंट

अलिकडेच हर्षवर्धन राणे 'एक दीवाने की दीवानियत' या चित्रपटात झळकला आहे. ज्यात तो सोनम बाजवासोबत रोमँटिक अंदाजात दिसला. चाहते आता हर्षवर्धन राणेच्या आगामी चित्रपटाची उत्सुकतेने वाट पाहत आहेत. हर्षवर्धन राणे तरुणाईचा आवडता अभिनेता आहे.