Fire At Sadashiv Amrapurkar House:

मराठी सिनेसृष्टीचे (Marathi Film Industry) लोकप्रिय दिवंगत अभिनेते सदाशिव अमरापूरकर (Sadashiv Amrapurkar) यांच्या घराला भीषण आग लागल्याची माहिती समोर आली आहे. अहमदनगर (Ahmednagar) येथील त्यांच्या फ्लॅटला अचानक आग लागली. या आगीमध्ये अभिनेत्याच्या घरातील वस्तूचे मोठे नुकसान झाले. याचवेळी त्यांच्या घरामध्ये अडकलेल्या एका महिलेची अग्निशमन दलाच्या जवानांकडून सुखरूप सुटका करण्यात आली. ही आग विझवण्यात अग्निशमन दलाच्या (Fire Brigade) जवानांना यश आले आहे.

मिळालेल्या माहितीनुसार, सदाशिव अमरापूरकर यांच्या अहमदनगर येथील घराला भीषण आग लागली. हे घर सुनंदा सदाशिव अमरापूरकर यांच्या नावाने आहे. अहमदनगर येथील सुमन अपार्टमेंटमध्ये त्यांचा फ्लॅट आहे. या फ्लॅटमध्ये भाडेकरू राहत होते. ज्योती भोर पठारे असं या भाडेकरूचे नाव आहे. सदाशिव अमरापूरकर यांच्या घराला मंगळवारी दुपारी शॉर्टसर्किटमुळे अचानक आग लागली. आग वाढत चालल्यामुळे अग्निशमन दलाला कॉल करण्यात आला.

घटनेची माहिती मिळताच अग्निशमन दलाच्या जवानांनी घटनास्थळी धाव घेतली. त्यांनी तात्काळ आग अटोक्यामध्ये आणली. या आगीमध्ये भाडेकरू ज्योती भोर पठारे या जखमी झाल्या आहेत. त्यांना उपचारासाठी रुग्णालयामध्ये दाखल करण्यात आले. या आगीत सुदैवाने कुठलीही जीवितहानी झाली नसल्याची माहिती अग्निशमन दलाच्या जवानांकडून देण्यात आली आहे.

तर, सुमन अपार्टमेंटमध्ये सदाशिव अमरापूरकर यांच्या मालकीचे एकूण चार फ्लॅट आहेत. याच अपार्टमेंटमध्ये मकरंद खेर देखील राहतात. या आगीमध्ये जखमी झालेल्या ज्योती भोर पठारे यांच्यावर नजीकच्या रुग्णालयामध्ये उपचार सुरू आहेत. धुरामुळे त्यांना श्वसनाला त्रास होत होता. त्यांची प्रकृती सध्या स्थिर असून उपचार सुरू आहेत.

दरम्यान, दिवंगत अभिनेते सदाशिव अमरापूरकर यांचा जन्म ११ मे १९५० साली अहमदनगर येथे झाला होता. त्याना अभिनयाची प्रचंड आवड होती. त्यांनी आपल्या करिअरची सुरूवात नाटकाने केली. जवळपास ५० नाटकांमध्ये त्यांनी काम केले. त्यानंतर अनेक मराठी आणि हिंदी चित्रपटांमध्ये त्यांनी दमदार भूमिका साकारल्या होत्या. ३ नोव्हेंबर २०१४ रोजी फुफ्फुसाच्या संसर्गामुळे त्यांचे निधन झाले. ६४ व्या वर्षी त्यांनी जगाचा निरोप घेतला.