बॉलिवूड अभिनेत्री दिशा पटानी (Disha Patani House Firing ) सध्या चांगली चर्चेत आहे. 12 सप्टेंबरला रात्री दिशा पटानीच्या घराबाहेर गोळीबार करण्यात आला. ही घटना तिच्या उत्तर प्रदेशातील बरेलीतील सिव्हिल लाईन्स येथे घडली. या घटनेने बॉलिवूड पुन्हा हादरले. या प्रकरणात हल्लेखोरांचा तपास पोलीस करत आहेत. आता या प्रकरणी मोठी अपडेट समोर आली आहे.

घडलेल्या हल्ल्याची जबाबदारी रोहित गोदारा गोल्डी ब्रार गँगने घेतली आहे. याप्रकरणी दिशा पटानीच्या वडिलांनी एफआयआर दाखल केला आहे. एफआयआरमध्ये नोंदवलेल्या जबाबानुसार, दिशा पटानीचे वडील जगदीश सिंह पटानी म्हणाले की, "हल्लेखोर त्यांना मारण्याच्या उद्देशाने घरात पोहोचले होते. 12 सप्टेंबर रोजी पहाटे 3.30 वाजताच्या सुमारास दुचाकीस्वारांनी त्यांच्यावर थेट गोळीबार केला. परंतु बाल्कनीच्या खांबाच्या मागे लपून राहून त्यांनी आपला जीव वाचवला."

मीडिया रिपोर्टनुसार, दिशा पटानीच्या घरावर दोन दिवसांत दोनदा हल्ला झाला आहे. अनिरुद्ध आचार्य यांच्या अपमानानंतर दिशा पाटनीच्या घराबाहेर गोळीबार झाल्याची चर्चा सर्वत्र पाहायला मिळत आहे. पोलीस या प्रकरणाचा गांभीर्याने तपास करत आहेत आणि हल्लेखोरांचा शोध घेत आहेत. पटानी कुटुंबाची सुरक्षा आता वाढवण्यात आली आहे.

मीडिया रिपोर्टनुसार, हल्ला करणाऱ्या टोळीने धमकी दिली आहे की, हा फक्त एक ट्रेलर आहे. पुढच्या वेळी ते आणखी धोकादायक गुन्हा करू शकतात. दिशा पटानीच्या वडिलांचे म्हणणे आहे की, "प्रत्येकाला त्यांचे मत मांडण्याचा अधिकार आहे आणि त्यांच्या मुलीचा किंवा बहिणीचा हेतू फक्त महिलांच्या अपमानाचा निषेध करण्याचा होता, परंतु काही लोकांनी ते विकृत केले आणि ते धर्माशी जोडले."