प्रसिद्ध हास्यकलाकार, लेखक आणि अभिनेता सागर कारंडे यांची तब्बल ६१.८३ लाख रुपयांची फसवणूक झाल्याची घटना उघडकीस आली आहे. "इन्स्टाग्रामवरील पोस्टला लाईक करून दीडशे रुपये मिळवा" या आमिषाला बळी पडून ही फसवणूक झाल्याचे समोर आले आहे. याप्रकरणी सायबर पोलिस ठाणे (उत्तर विभाग) येथे गुन्हा नोंदवण्यात आला आहे.

फेब्रुवारी महिन्यात, सागर कारंडे यांला अनोळखी व्हॉट्सॲप क्रमांकावरून एका महिलेचा मेसेज आला. त्या महिलेने टेलिग्राम व अन्य समाजमाध्यमांवर इन्स्टाग्राम लिंक पाठवत त्यावर लाईक करण्याची विनंती केली. प्रत्येक लाईकसाठी १५० रुपये दिले जातील आणि घरबसल्या ६,००० पर्यंत कमवता येईल असे सांगितले.

सागरनी त्यास होकार दिला आणि काम सुरू केले. मात्र नंतर विविध कारणांनी पैसे गुंतवायला लावून सायबर भामट्यांनी त्यांची लाखो रुपयांची फसवणूक केली.

फसवणुकीची प्रक्रिया

१. सागरला सुरुवातीला ११ हजार रुपये दहा वेळा मिळाले, ज्यामुळे त्याचा विश्वास बसला. पुढे अधिक पैसे कमवण्यासाठी गुंतवणूक करावी लागेल, असे सांगण्यात आले.

२. सुरुवातीला सागरने थोडी रक्कम गुंतवली. भामट्यांनी तयार केलेल्या वॉलेटवर कमिशन व मोबदला जमा केला गेला. पुढे सागरने २७ लाख रुपये गुंतवले. पैसे काढताना, "८०% टास्क पूर्ण आहे, १००% झाल्यावरच पैसे काढता येतील" असे सांगण्यात आले.

३. आणखी १९ लाख रुपये आणि त्यावर ३०% कर भरायला लावण्यात आला. एकूण सागरकडून ६१.८३ लाख रुपये घेतले गेले. नंतर कर चुकीच्या खात्यात भरल्याचे सांगून पुन्हा पैसे मागण्यात आले. यावरून सागरला संशय आला आणि त्याने सायबर हेल्पलाइनवर तक्रार नोंदवली.

Edited By - Purva Palande