मुंबई : बॉलिवूडची स्टाइल आयकॉन सोनम कपूर(Sonam Kapoor) लवकरच आई होणार आहे. कपूर-आहुजा कुटुंबीयांच्या घरी येणाऱ्या चिमुकल्या पाहुण्याच्या आगमनाची सगळेच वाट बघत आहेत. या महिन्यात सोनम कपूरच्या घरी चिमुकला पाहुणा येणार आहे. 'गुड न्यूज'नंतर संपूर्ण कपूर फॅमिली नवीन पाहुण्याच्या स्वागताची तयारी करत आहे.

माहितीनुसार, सोनम कपूर आणि आनंद आहुजा यांच्या पहिल्या मुलाचा जन्म सोनमच्या आई-वडिलांच्या म्हणजेच अभिनेता अनिल कपूरच्या(Anil Kapoor) घरी होणार आहे. लग्नानंतर सोनम कपूर लंडनमध्ये पती आनंद आहुजासोबत राहत आहे. आनंद आणि सोनम यांचे दिल्लीतही आलिशान घर आहे. सोनम तिच्या पालकांच्या घरी ६ महिने राहणार आहे. त्यानंतर सोनम तिच्या पतीसोबत लंडनला जाईल. त्यानंतर सोनम पुन्हा बॉलिवूडमध्ये पुनरागमन करणार आहे. तिच्याकडे अनेक चित्रपट आहेत. त्यांचे चित्रीकरण पूर्ण करण्यावर तिचा भर असेल.

सोनम कपूर आणि आनंद आहुजा यांची जोडी चाहत्यांना खूप आवडते. त्यांच्या घरी येणाऱ्या चिमुकल्या पाहुण्याची पहिली झलक बघण्यासाठी फॅन्स उत्सुक आहेत. सोनमने गरोदरपणात अनेक फोटोशूट केले आणि सोशल मीडियावर शेअरही केले. सोनमने अनेकदा बेबी बंप फ्लॉंट केले होते. सोनमच्या बेबी शॉवरचा सोहळा लंडनमध्ये पार पडला होता. कपूर कुटुंबीयांनीही मुंबईत सोनमच्या बेबी शॉवर फंक्शनची तयारी केली होती, पण शेवटच्या क्षणी कोविड महामारीमुळे त्यांना सर्व कार्यक्रम रद्द करावे लागले होते.