Diljit Dosanjh And Parineeti Chopra:

पंजाबी गायक आणि अभिनेता दिलजीत दोसांझ (Diljit Dosanjh) सध्या चर्चेत आहे. दिलजीत दोसांझ त्याच्या मोस्ट अवेटेड चित्रपट चमकीलामुळे चर्चेत आहे. नुकताच निर्मात्यांनी या चित्रपटातील दिलजीतचा फर्स्ट लूक शेअर केला आहे. इम्तियाज अली (Imtiaz Ali) दिग्दर्शित हा चित्रपट अमर सिंग 'चमकिला' (Chamkila Movie) यांच्या जीवनावर आधारित आहे. या चित्रपटात दिलजीत दोसांझ हा अमर सिंग यांची भूमिका साकारत आहे. 'चमकिला'च्या फर्स्ट लूकमध्ये एका कॅसेटवर दिलजीत दोसांझचा फोटो दिसत आहे. 'चमकिला'मधून दिलजीतची पहिली झलक समोर आल्यानंतर चाहत्यांची चित्रपटाबाबतची उत्सुकता आणखी वाढली आहे.

नेटफ्लिक्सने नुकतेच सोशल मीडियावर 'चमकिला'चे मूविंग पोस्टर शेअर केले आहे. हे पोस्टर शेअर करत त्यांनी कॅप्शनमध्ये असे लिहिले की, 'माहोल बन जाता था जब वो छेडता था साज, कुछ ऐसा ही था चमकिला का अंदाज.' अमर सिंह 'चमकिला'चे आयुष्य पडद्यावर पाहण्याची चाहत्यांची इच्छा अखेर पूर्ण होणार आहे. 'चमकिला' चित्रपटगृहात प्रदर्शित होणार नसून थेट ओटीटी प्लॅटफॉर्मवर प्रदर्शित केला जाणार आहे.

दिलजीत दोसांझ स्टारर 'चमकिला' हा चित्रपट १२ एप्रिल २०२४ रोजी ओटीटी प्लॅटफॉर्म नेटफ्लिक्सवर (Netflix) रिलीज होणार आहे.'चमकिला'मध्ये दिलजीत दोसांझसोबत परिणीती चोप्राही महत्त्वाच्या भूमिकेत दिसणार आहे. 'चमकिला' या चित्रपटात एआर रहमान यांनी संगीत दिले आहे. तर इर्शाद कामिलने गाण्याचे बोल लिहिले आहेत.

रेहमान आणि इम्तियाज यांच्या बहुप्रतिक्षित आणि जादुई सहकार्याची चित्रपट चाहते आतुरतेने वाट पाहत आहेत. महत्वाचे म्हणजे, दिलजीत दोसांझ आणि परिणीती चोप्रा यांनी चमकिला चित्रपटातील अनेक गाण्यांना आपला आवाज दिला आहे. अभिनेत्री परिणीती चोप्रानेही काही दिवसांपूर्वी एका मुलाखतीत सांगितले होते की, तिने या चित्रपटातील १५ गाण्यांना आवाज दिला आहे. प्रेक्षक या चित्रपटाची वाट पाहत आहेत.