Dunki 2nd Day Box Office Collection

राजकुमार हिराणी दिग्दर्शित ‘डंकी’ चित्रपटाची सध्या सोशल मीडियावर प्रचंड चर्चा होत आहे. चित्रपट प्रदर्शित होऊन दोन दिवस झाले असून चित्रपट सध्या बॉक्स ऑफिसवर दिलासादायक कमाई करताना दिसत आहे. शाहरुखच्या चित्रपटांची कायमच चाहत्यांमध्ये क्रेझ असते. ‘पठान’ आणि ‘जवान’ प्रमाणे ‘डंकी’ची सुद्धा चाहत्यांमध्ये जोरदार चर्चा आहे. चित्रपटाची निर्माती गौरी खानने सोशल मीडियावर एक पोस्ट शेअर केली आहे. शेअर केलेल्या पोस्टमध्ये गौरीने चित्रपटाच्या दोन दिवसांच्या कमाईचा आकडा शेअर केला आहे.

निर्माती गौरी खानने शेअर केलेल्या पोस्टमध्ये, चित्रपटाने दोन दिवसांत जगभरामध्ये ५८ कोटींची कमाई केल्याची माहिती दिली आहे. किंग खानच्या ‘डंकी’ चित्रपटाने दोन दिवसांत बॉक्स ऑफिसवर ४९. २० कोटींची कमाई केली आहे. पहिल्या दिवशी २९. २ कोटी तर, दुसऱ्या दिवशी चित्रपटाने २० कोटींची कमाई केली आहे. चित्रपटाच्या कमाईचा आकडा शेअर करताना, ‘बरेच लांबून आलो होतो... आता खूप लांब जाऊ असं वाटतंय, तुमच्या प्रेमाने आणखी लांबचा पल्ला गाठायचा आहे.’ असं कॅप्शन तिने दिले आहे.

चित्रपटामध्ये चार मित्रांची कथा दाखवली आहे. त्यांना परदेशामध्ये जाण्याची इच्छा असते. पण पासपोर्ट नसल्यामुळे ते कशाप्रकारे परदेशामध्ये जाण्यासाठी चुकीचा मार्ग निवडतात. ते चारही मित्र परदेशामध्ये कसे जातात, हे आपल्याला चित्रपट पाहिल्यावरच कळेल. 'डंकी' हा कौटुंबिक चित्रपट आहे. चित्रपटाचे दिग्दर्शन राजकुमार हिराणी करीत असून शाहरुख खानसह तापसी पन्नू, विक्रम कोचर, अनिल ग्रोवर, बोमन ईरानी आणि विकी कौशल महत्त्वाच्या भूमिकेत आहेत.