मुंबई: बॉलिवूड (Bollywood)अभिनेत्री यामी गौतम हिनं आपल्या कारकिर्दीत खूप कमी हिट चित्रपट दिले असले तरी, आपल्या अभिनयातून तिनं आपली छाप पाडली आहे. आता यामी गौतम (Yami Gautam) हिने अलीकडेच दिलेल्या एका मुलाखतीत बॉलिवूड इंडस्ट्रीबद्दल मोठा खुलासा केला आहे. अनेक चित्रपट असे आहेत की ते इच्छा नसतानाही केले आहेत, असा दावा तिने केला आहे. टीमने सांगितले म्हणून ते चित्रपट केले. त्यात एका स्टार अभिनेत्यासोबत काम करण्याचा सल्लाही देण्यात आला होता. तसेच ऋतिक रोशनसोबत 'काबिल' चित्रपट केला होता. तोही माझ्या इच्छेविरोधात केला, असंही तिनं सांगितलं.

काबिल एक रोमँटिक आणि थ्रिलर चित्रपट होता. २०१७ मध्ये तो प्रदर्शित झाला होता. संजय गुप्ता यांनी या चित्रपटाचं दिग्दर्शन केलं होतं. ऋतिक रोशननं या चित्रपटात एका ब्लाइंड व्हाइसओव्हर आर्टिस्टची भूमिका साकारली होती. तर यामी गौतमनं या चित्रपटात ऋतिकच्या पत्नीची भूमिका केली होती. बॉक्स ऑफिसवर हा चित्रपट हिट ठरला होता. मात्र, यामी गौतमचं म्हणणं वेगळंच आहे. या चित्रपटातील तिची भूमिका फार लक्षवेधी ठरली नाही. या चित्रपटातून फारशी दखल घेतली नाही, असं तिचं म्हणणं आहे.

या मुलाखतीत तिने अनेक खुलासे केले. आयुष्यातील एक काळ असा असतो की, तुम्ही ट्रेंड फॉलो करत असता. मला त्याचा अनुभव आलाय. अनेक चित्रपट मी इच्छेविरोधात केले आहेत. कारण ते करण्यासाठी कुणीतरी सांगितले होते. तुम्हाला चित्रपटाची कॉन्सेप्ट लक्षात येत नाही. तरीही तुम्ही तो चित्रपट करता. असे चित्रपट न करता मी कुंगफू शिकायला हवं होतं, असं मला वाटतं. अशा चित्रपटांत काम करण्यापेक्षा मला अन्य काही शिकायला हवं होतं, असं यामी गौतमनं सांगितलं.