Manoj Bajpayee: मुंबईतील वाढती लोकसंख्या, गजबजाट आणि धावपळीच्या जीवनशैलीमुळे अनेक सेलिब्रिटी शहरापासून दूर निसर्गरम्य ठिकाणी गुंतवणूक करण्याला पसंती देतात. आता या यादीत अभिनेता मनोज वाजपेयी यांचाही समावेश झाला आहे. आपल्या दमदार अभिनयासाठी ओळखले जाणारे मनोज वाजपेयी यांनी पुणे जिल्ह्यातील मुळशी तालुक्यात जमीन खरेदी केली आहे. मुंबईच्या गजबजाटापासून दूर असलेल्या ग्रामीण आणि निसर्गरम्य परिसरात त्यांनी तब्बल १.८० हेक्टर म्हणजेच जवळपास ४.४५ एकर जमीन खरेदी केली आहे. या जमिनीच्या व्यवहारासाठी त्यांनी कोट्यवधी रुपये खर्च केले आहेत.

१.३७ कोटी रुपयांना खरेदी केली जमीन

‘इंडियन एक्स्प्रेस’च्या वृत्तानुसार, मालमत्ता नोंदणीच्या कागदपत्रांमधून मनोज वाजपेयी यांच्या या गुंतवणुकीची माहिती समोर आली आहे. CRE Matrix कडून मिळालेल्या मालमत्ता नोंदणीच्या कागदपत्रांनुसार, त्यांनी १.८० हेक्टर जमीन १.३७ कोटी रुपयांना खरेदी केली आहे. ही जमीन खरेदी करण्याचा व्यवहार २५ ऑगस्ट रोजी झाला. या व्यवहारासाठी मनोज वाजपेयी यांनी ६.८७ लाख रुपये स्टॅम्प ड्यूटी भरली. त्यानुसार, जमिनीची व्यवहारातील किंमत प्रति एकर सुमारे ३०.९ लाख रुपये असल्याचं सांगितलं जात आहे. मनोज वाजपेयी यांनी ही जमीन विमलचंद खिमराज जैन यांच्याकडून खरेदी केल्याची माहिती मालमत्ता नोंदणी कागदपत्रांमध्ये नमूद आहे.

मुंबई आणि पुण्यापासून किती दूर आहे?

मनोज वाजपेयी यांनी जमीन खरेदी केलेलं मुळशी तालुक्यातील तैल बैला हे गाव मुंबई आणि पुण्यापासून तुलनेने दूर, निसर्गरम्य परिसरात आहे. हे गाव मुंबईपासून सुमारे ११९ किलोमीटर, तर पुण्यापासून सुमारे १०१ किलोमीटर अंतरावर आहे. हे ठिकाण लोणावळ्याजवळ वसलेलं आहे.

तैल बैला कशासाठी प्रसिद्ध?

तैल बैला हे ठिकाण पर्यटनासाठी प्रसिद्ध आहे. महाराष्ट्र गडकिल्ले या ट्रॅव्हल ग्रुपच्या माहितीनुसार, येथे तब्बल २०० ते २५० फूट उंचीच्या दोन भव्य खडकांच्या भिंती आहेत. रॉक क्लायंबिंग आणि रॅपलिंगसाठी हे ठिकाण विशेष प्रसिद्ध आहे. याच परिसरात सुमारे ३,३२२ फूट उंचीवर तैल बैला किल्ला आहे. त्यामुळे निसर्ग, शांतता आणि साहसी पर्यटनाचा अनुभव घेण्यासाठी हा परिसर पर्यटकांमध्ये लोकप्रिय आहे. मनोज वाजपेयी यांनी अशा निसर्गरम्य ठिकाणी जमीन खरेदी केल्याने त्यांच्या या नव्या गुंतवणुकीची सध्या चांगलीच चर्चा रंगली आहे.