Varun- Natasha: २०२२ हे वर्ष मनोरंजन क्षेत्रासाठी खूपच स्पेशल ठरले आहे. या वर्षात अनेक बहुचर्चित आणि बहुप्रतिक्षित जोडप्यांचे लग्न पार पडले आहे. तर बऱ्याच कलाकारांच्या घरी बाळाचे आगमन झाले आहेत. प्रियंका- निक, सोनम- आनंद, भारती- हर्ष, बिपाशा- करण आणि आलिया- रणबीर या जोड्यांच्या घरी पाळणा हलला आहे. या यादीत आणखी एका जोडीचे नाव जोडले जाणार आहे. ती जोडी म्हणजे, वरुण धवन- नताशा दलाल. लवकरच वरुण- नताशा आई बाबा होणार असल्याचे वृत्त खुद्द सलमान खानने दिले आहे.

वरुण धवन आणि क्रिती सेनन आपला आगामी चित्रपट 'भेडिया'च्या प्रमोशनमध्ये व्यग्र आहेत. दोघांनी बिग बॉस 16 च्या सेटवर चित्रपटाचे प्रमोशन देखील केले. तेथे वरुण आणि क्रितीने सलमान खानसोबत काही मजेदार खेळही खेळले.

सोबतच सर्व स्पर्धकांशी संवादही साधला. सोबतच सर्वांचेच लक्ष वेधून घेतले ते एका टॉय गिफ्टने. सलमानने वरुण धवनला बिग बॉसच्या घरात एक सॉफ्ट टॉय भेट म्हणून दिली. खरंतर हे गिफ्ट येणाऱ्या छोट्या बाळासाठी होतं.

वरुण धवन आणि क्रिती सेननसोबतच्या मजेशीर भागानंतर, सलमान खानने वरुण धवनला एक सॉफ्ट टॉय दिले. वरुणने विचारले की त्याचे काय करणार, त्यावर सलमानने लगेच उत्तर दिले, "हे तुमच्या मुलासाठी आहे" यामुळे वरुण लाजला आणि तो म्हणाला, "मला अजून मूल नाही."

यावर सलमानने विनोद केला की, "खेळणं आलंय, मूलही लवकरच येईल." सलमान खानच्या या इशाऱ्यावरून वरुण आणि नताशा लवकरच आई-बाबा होणार असल्याचं दिसतंय. पण अजून तरी वरुणने याबाबत अधिकृत माहिती दिलेली नाही.

वरुण आणि नताशा २४ जानेवारी २०२२ रोजी अलिबागमध्ये जवळच्या नातेवाईकांसोबत आणि मित्रपरिवारांसोबत लग्नबंधनात अडकले होते. याआधी एकदा नाही दोनदा नताशा प्रेग्नेंट असल्याची चर्चा रंगली होती. पण त्यावेळी नताशाने अफवा असल्याचे सांगत त्या चर्चांवर पांघरुन टाकले. यावेळी सलमानजे बोलला आहे, ते खरोखर ठरतं का हे जाणण्यासाठी दोघांचेही चाहते आतुर झाले आहेत.