बिग बॉस मराठीच्या सीझन ५ ला प्रेक्षकांकडून खूप चांगला प्रतिसाद मिळत आहे. बिग बॉसच्या घरातील सर्व स्पर्धक पहिल्या दिवसापासून प्रेक्षकांचे चांगले मनोरंजन करत आहेत. पहिल्याच आठवड्यामध्ये या स्पर्धकांमध्ये जोरदार वाद, राडा, भांडणं पाहायला मिळाली. आता बिग बॉसच्या घरामध्ये कॅप्टन्सी कार्य रंगणार आहे. या कॅप्टन्सी टास्क दरम्यान जोरदार राडा झाल्याचे चित्र पाहायला मिळाले. बिग बॉस मराठीचा नवा पोमो समोर आला असून यामध्ये निक्की तांबोळी आणि आर्या जाधवमध्ये जोरदार वाद झाल्याचे दिसत आहे.

बिग बॉसच्या घरामध्ये आल्यानंतर दोन ग्रुप झाले. निक्की तांबोळीचा ग्रुप आर्या जाधवला टार्गेट करताना दिसत आहे. बालिश म्हणत आर्याला सतत डिवचले जात आहे. अशामध्ये 'भाऊचा धक्का'मध्ये देखील अनेक स्पर्धकांनी आर्याला बालिशचा टॅग दिला. त्यामुळे आर्या निक्कीच्या ग्रुपवर चांगलीच संतापली आहे. अशामध्ये नुकताच पार पडलेल्या कॅप्टन्सी टास्कमध्ये आर्या आणि निक्की आमने सामने आले. यावेळी निक्कीने आर्याला अडवण्याचा प्रयत्न केला. त्यानंतर आर्या निक्कीवर संतापते आणि जोरजोरात ओरडू लागते. त्यानंतर आर्या निक्कीला ढकलून देत फालतू म्हणते. दोघींची जोरदार बाचाबाची झाली.

बिग बॉसच्या घरामध्ये आधी जान्हवी आणि आर्यामध्ये जोरदार भांडण झाले होते. दोघींनी एकमेकांवर हात उचलला होता. त्यानंतर भाऊचा धक्कामध्ये रितेश देशमुखने दोघांना चांगलाच ओरडा दिला होता. त्यानंतर दोघींनाही इथून पुढे घरामध्ये असं न वागण्याचा सल्ला देत शांत राहण्यास सांगण्यात आले. आता निक्की आणि आर्यामध्ये वाद झाला आहे. त्यामुळे या आठवड्याच्या भाऊचा धक्कामध्ये रितेश देशमुख या दोघींना काय बोलतोय हे पाहणं महत्वाचे राहिल. बिग बॉसच्या घरामध्ये अभिजीत सावंत आणि अरबाज पटेल यांच्यामध्ये कॅप्टन्सी टास्क रंगला आहे. आता कोण बिग बॉस मराठी ५ चा पहिला कॅप्टन होतोय हे आजच्या एपिसोडमध्ये कळणार आहे.