'बिग बॉस मराठी 6' मध्ये आज शनिवारी चौथ्या भाऊचा धक्का रंगणार आहे. या आठवड्यात बिग बॉसच्या घरात खूपच जास्त ड्रामा पाहायला मिळाला. घरातील सदस्यांना धमकी दिल्यामुळे दिव्या शिंदेला घरातून बाहेर काढण्यात आले. तसेच आता घरात राखी सावंत येणार असल्याची चर्चा सोशल मीडियावर रंगली आहे. नुकताच बिग बॉसने एक खास प्रोमो शेअर केला आहे. ज्यात रितेश देशमुख संतापलेला पाहायला मिळत आहे.

बिग बॉसने शेअर केलेल्या व्हिडीओत रितेश भाऊ रुचिताची चांगली शाळा घेताना दिसत आहे. या आठवड्यात रुचिताच राकेश बापट आणि दिपाली सय्यदसोबत कडाक्याचे भांडण होते. प्रोमोच्या व्हिडीओमध्ये रितेश भाऊ रुचिताला म्हणतात की, "रुचिता या घराचा सगळ्यात मोठा व्हिलन तुम्ही ठरला आहात...सतत उद्धट वागायचे... टास्क रद्द कसा होईल तेच बघायचे...एकही दिवस असा सोडला नाही जिथे तुम्ही लिमिट क्रॉस केली नाही..."

व्हिडीओच्या शेवटी रुचिताला रितेश भाऊ हातात कुऱ्हाड घ्यायला सांगताना दिसत आहे. या व्हिडीओवर नेटकरी कमेंट्सचा पाऊस पडत आहे. रुचिताची शाळा घेतल्यामुळे प्रेक्षकांना प्रचंड आनंद झाला आहे. रुचिता शोच्या पहिल्या दिवसापासून घरात भांडताना, गोंधळ घालताना दिसत आहे. तन्वी आणि रुचितामध्ये कायम भांडणे होताना पाहायला मिळतात.

बिग बॉसच्या घरात या आठवड्यात 9 सदस्य नॉमिनेट झाले आहेत. यात ओमकार राऊत, आयुष संजीव, सचिन कुमावत, प्रभू शेळके, दिपाली सय्यद, अनुश्री माने, दिव्या शिंदे, रोशन भजनकर आणि राकेश बापट यांचा समावेश आहे. आतापर्यंत बिग बॉसच्या घरातून राधा पाटील, सोनाली राऊत आणि दिव्या शिंदे हे तीन सदस्य बाहेर गेले आहेत. 'बिग बॉस मराठी ६' हा शो रात्री 8 वाजता 'कलर्स मराठी' आणि 'जिओहॉटस्टार'वर पाहायला मिळणार आहे.