आज बिग बॉसच्या घरात भाऊचा धक्का गाजणार आहे. रितेश देशमुख अनुश्री माने ते सोनाली राऊत सगळ्यांची शाळा घेताना दिसणार आहे. रितेश अनुश्रीला तिच्या घरातील दादागिरीवरून चांगले खडेबोल सुनावतो. तर घरातील एका सदस्याला थेट एलिमिनेट करणार असल्याचा इशारा देतो. त्यामुळे घरातील वातावरण खूपच गंभीर पाहायला मिळते. या आठवड्यात 'शेणाचं दार अन् मेणाचं दार' हा कॅप्टन्सी उमेदवारीसाठी टास्क खेळला गेला. या खेळात 'पॉवर Key' जिंकून कॅप्टन्सी उमेदवारी मिळवण्याची संधी होती.

'शेणाचं दार अन् मेणाचं दार' हा कॅप्टन्सी टास्क सोनाली राऊत खेळली नाही. त्यामुळे बिग बॉसने तिला पुढच्या आठवड्यासाठी थेट नॉमिनेट केले. या मुद्द्यावरून रितेश भाऊ सोनालीवर चांगलेच भडकणार आहेत. बिग बॉसला घराचा दुसरा कॅप्टन भेटला आहे. येणाऱ्या आठवड्यात आयुष संजीवकडे बिग बॉसच्या घराची सत्ता पाहायला मिळणार आहे.

रितेश भाऊ सोनालीला म्हणतात की, "सोनाली तुम्ही ठरवलं, की त्या शेणाच्या दाराखाली तुम्ही नाही उभ्या राहणार... मग, तुम्ही आलात कशाला येथे? टास्क खेळायला आलात ना तुम्ही..." त्यावर सोनाली म्हणते की, "पण मला जे वाटलं..." इतक्यात रितेश भाऊ सोनालीला थांबवत म्हणतो की, "ओ एक मिनिट, हा Attitude ना तुमच्या घरी ठेवायचा. या घरात नाही...इथे सगळे सारखे आहेत. यावेळी नॉमिनेट केलंय... पुढच्या वेळेस घराच्या बाहेर काढेन..."

रितेश देशमुखचे हे बोलणे ऐकताच सोनालीचा चेहरा उतरतो. तसेच घरात तणावाचे वातावरण निर्माण होते. आता रितेश भाऊंनीच थेट घराबाहेर जाण्याचा इशारा दिल्यामुळे सोनालीच्या डोक्यावर एलिमिनेशनची टांगती तलवार पाहायला मिळणार आहे. तसेच सोनालीने वेळेत आपला गेम बदलला नाही तर तिला खरंच घराबाहेर काढू शकतात. आता भाऊच्या धक्क्यावर नेमकं काय, काय होणार हे पाहणे महत्त्वाचे ठरणार आहे. 'बिग बॉस मराठी ६' हा शो रात्री 8 वाजता 'कलर्स मराठी' आणि 'जिओहॉटस्टार'वर पाहायला मिळणार आहे.