'बिग बॉस'मुळे अनेक कलाकारांना लोकप्रियता मिळते. 'बिग बॉस' फेम अभिनेत्री अर्चना गौतम अलिकडेच राजीव खंडेलवाल होस्ट करत असलेल्या 'तुम हो ना' या रिॲलिटी शोमध्ये सहभागी झाली. त्यात तिने कारकिर्दीच्या सुरुवातीच्या काळात आलेल्या संघर्षाबद्दल मनमोकळेपणाने संवाद साधला. यात तिने 'सीआयडी' बद्दलची आठवण सांगितली.

अभिनेत्री अर्चना गौतमने एकेकाळी 'सीआयडी' या गाजलेल्या मालिकेत मृतदेहाची भूमिका साकारली होती. ज्यासाठी तिला ३ हजार रुपयांचे मानधन मिळले होते. ती म्हणाली की, "लोकांना अनेकदा वाटते की या इंडस्ट्रीमध्ये सर्व काही खूप सोपे आहे, रातोरात काम मिळते. पण हे खरे नाही. खरं तर, मी केलेल्या खऱ्या संघर्षाबद्दल बहुतेक लोकांना माहिती नाही. माझी तिसरी टेलिव्हिजन मालिका 'सीआयडी' होती, ज्यात मी एका मृतदेहाची भूमिका साकारली होती आणि मला दिवसाला ३,००० रुपये मिळायचे."

पुढे अभिनेत्री म्हणाली की, "मी तिथे निष्प्राण असल्याचा अभिनय करत पडून असताना सेटवरचे ज्येष्ठ कलाकार माझे डोळे तपासत होते, हे मला अजूनही आठवते. मला मृतदेहाची भूमिका साकारण्याची सवय नव्हती, त्यामुळे तो एक वेगळाच अनुभव होता. आता मागे वळून पाहताना मला वाटते की, आज मी जिथे आहे तिथे पोहोचण्यापूर्वी अनेक टेलिव्हिजन मालिकांमध्ये अनेक छोट्या भूमिका साकारून केलेली खूप मेहनत कारणीभूत आहे."

अर्चना गौतमने आजवर अनेक मालिकांमध्ये काम केले आहे. ती सलमान खानच्या 'बिग बॉस १६' ची सदस्य राहीली आहे. तसेच ती 'खतरों के खिलाडी १३' मध्ये ही दिसली. अर्चना गौतम सोशल मीडियावर देखील खूप सक्रिय असते.