सलमान खान होस्ट करत असलेला शो 'बिग बॉस २०' सुरु होऊन आता एक आठवडा झाला आहे. पहिल्याच आठवड्यात घरात तुफान राडा पाहायला मिळाला. नॉमिनेशन आणि कॅप्टन्सी टास्क दरम्यान भांडणे झाली. घरात प्रेमाची नाती देखील खुलताना दिसत आहे. भाईजानने देखील पहिल्याच 'वीकेंड का वार'मध्ये काही सदस्यांची चांगलीच शाळा घेतली तर काहींचे कौतुक केले.

सलमान खानने कनिका मान आणि गुल्लू यांचे कौतुक केले. 'बिग बॉस २०'च्या घरात हे नवीन कपल पाहायला मिळत आहे. बिग बॉसने शेअर केलेल्या नवीन प्रोमो व्हिडीओमध्ये गुल्लू कनिकाला प्रपोज करताना दिसत आहे. तर दोघांनी रोमँटिक कपल डान्स देखील केला. प्रेक्षकही या जोडीला भरपूर प्रेम देत आहेत. सलमान खान गुल्लूला कनिकाला इंग्रजीमध्ये प्रपोज करण्यास सांगतो.

गुल्लू प्रपोज करत बोलतो की, "तू मला सुंदर वाटलीस...जर तुला चौधरी व्हायचे असेल, तर तुला खूप मेहनत करावी लागेल..." त्यावर कनिका म्हणाली, "मी माझ्या परीने सर्वोत्तम प्रयत्न करेन..." गुल्लूच्या या बोलण्याने सलमान आणि घरातील इतर सदस्यांच्या चेहऱ्यावर हसू आले. कनिका जिममध्ये कसा व्यायाम करते हे गुल्लूने सर्वांना अभिनय करून दाखवले. त्यानंतर त्या दोघांनी एक रोमँटिक डान्स केला. डान्स पाहून सलमान म्हणाला, "तुम्ही दोघे एकत्र खूप छान दिसता..."

आता कनिका आणि गुल्लूची मैत्री बिग बॉसच्या घरात कशी वळण घेते पाहणे महत्त्वाचे ठरणार आहे. कनिका आणि गुल्लूच्या या व्हिडीओवर प्रेक्षक कमेंट्सचा वर्षाव करत आहेत. लोकांना ही जोडी खूपच आवडली आहे. काहींनी याला प्रेम तर काहींनी निखळ मैत्री बोलले आहेत. दोघांची केमिस्ट्री चाहत्यांना वेड लावत आहे. 'बिग बॉस २०' जिओ हॉटस्टार पाहायला मिळेल. तसेच कलर्स टीव्हीवर रात्री १०:३० वाजता पाहायला मिळेल.