Bigg Boss 17 New Promo Video:

'बिग बॉस'चा १७ वा (Bigg Boss 17) सीझन सुरू होऊन आता आठवडा पूर्ण होईल. या शोमध्ये एकूण १७ स्पर्धक सहभागी झाले आहेत. सलमान खानच्या या वादग्रस्त शोमधून दिवसेंदिवस प्रेक्षकांचे चांगले मनोरंजक होत आहे. बिग बॉसच्या घरामध्ये आल्यापासूनच स्पर्धकांमध्ये भांडण होत असल्याचे आपण पाहत आहोत. पण आता हा वाद इतका वाढत चालला आहे की काही स्पर्धक मारण्यासाठी एकमेकांच्या अंगावर धावून जात असल्याचे दिसत आहे.

अशामध्ये नुकताच अभिनेत्री अंकिता लोखंडेचा (Ankita Lokhande) नवरा म्हणजेच बिझनेसमन विकी जैन (Vicky Jain) आणि अभिनेता नील भट्ट (Neil Bhatt) यांचे कडाक्याचे भांडण झाले. नीलचा पारा ऐवढा चढला की तो थेट विकीला मारण्यासाठी त्याच्या अंगावर धावून गेला. याची झलक प्रोमो व्हिडीओमध्ये पाहायला मिळाली. जो सध्या सोशल मीडियावर व्हायरल होत आहे.

बिग बॉस 17 च्या आगामी एपिसोडमध्ये घरामध्ये सर्वात जास्त शांत स्वभावाचा नील भट्ट देखील संतापलेला दिसणार आहे. अंकिता लोखंडेचा पती विकी जैन त्याच्या रागाचे कारण ठरला आहे. समोर आलेल्या प्रोमोमध्ये अभिनेता विकी जैनसोबत नील भांडताना दिसत आहे. यावेळी नील इतका हायपर होतो की इतर जण त्याला शांत करण्याचा प्रयत्न करतात. पण नील ऐकायला तयार नसतो.

दरम्यान, विकी पुन्हा असे काहीतरी बोलतो ज्यामुळे नीलचा संयम सुटतो आणि तो विकीला मारण्यासाठी धावतो. आपल्या पतीला एवढा संतप्त झाल्याचे पाहून ऐश्वर्या शर्माने ही या भांडणात हस्तक्षेप केला आणि नीलला रोखण्याचा प्रयत्न केला.

नील भट्ट आणि त्याची पत्नी ऐश्वर्या शर्मा यांनी बिग बॉसच्या घरामध्ये एकत्र एन्ट्री केली. या शोमध्ये आल्यापासून हे कपल खूपच गोंधळलेले दिसत होते. ज्यानंतर बिग बॉसने त्याचा गोंधळ दूर केला आणि त्यांना गेममध्ये सक्रिय राहण्याचा सल्ला दिला. यानंतर बिग बॉसने नीलला घरात आपले लक्ष्य कोण असेल याबद्दल विचारले. त्याला प्रत्युत्तर म्हणून त्याने अंकिता आणि विकीची नावे घेतली होती.

आता नीलला राग कशाचा? याचा खुलासा प्रोमोमध्ये करण्यात आलेला नाही. पण या प्रोमोवरून आजचा एपिसोड खूपच धमाकेदार असणार हे दिसत आहे. नील आणि विकीचे भांडण कशावरून झाले याचे उत्तर तर तुम्हाला आजच्या एपिसोडमधून मिळेल.