मुंबई : अभिनेत्री अथिया शेट्टी (Athiya Shetty) आणि भारतीय क्रिकेटपटू के.एल. राहुल(KL Rahul) खूप दिवसांपासून एकमेकांना डेट करत आहेत. आपल्या नात्यामुळे चर्चेत असलेल्या या कपलबद्दल एक बातमी आली आहे की, अथिया आणि राहुल येत्या तीन महिन्यांत लग्न करणार आहेत आणि त्याची तयारी जोरात सुरू आहे. पण वृत्ताला पूर्णविराम देत अथियाने एक मजेशीर पोस्ट इन्स्टाग्राम हॅंडलवर शेअर करून याचे खंडन केले आहे.

बॉलिवूड अभिनेता सुनील शेट्टीची मुलगी अथिया शेट्टी आणि क्रिकेटपटू के.एल. राहुल येत्या तीन महिन्यात लग्नबंधनात अडकणार आहेत. या बातमीमुळे हे कपल खूप चर्चेत आहे. अथियाने नुकतेच या बातमीसंदर्भात इन्स्टाग्राम स्टोरीवर एक मजेदार पोस्ट लिहिली आहे. ज्यामध्ये लग्नाच्या बातम्या केवळ अफवा असल्याचे स्पष्ट केले आहे. 'मला आशा आहे की पुढील ३ महिन्यांत होणाऱ्या या लग्नासाठी मला आमंत्रित केले जाईल'. असे अथियाने तिच्या पोस्टमध्ये लिहून या अफवांना पूर्णविराम लावला आहे.

मंगळवार पासून प्रसारमाध्यमांकडून असा दावा करण्यात आला की अथिया शेट्टी आणि के.एल. राहुल लवकरच लग्न करणार आहेत. मात्र, त्यांच्या लग्नाबाबत अशी चर्चा होण्याची ही पहिलीच वेळ नाही. परंतु, दोघांनीही त्यांच्या लग्नाबाबत कोणतीही अधिकृत माहिती दिलेली नाही. दुसरीकडे, आकाशवाणी सोबत केलेल्या मुलाखतीत अथियाचे वडील सुनील शेट्टीला विचारण्यात आले की, कुटुंबाने लग्नाची तयारी सुरू केली आहे का? त्यावर त्यांनी उत्तर दिले, 'नाही, अद्याप काहीही प्लॅन केलेले नाही!'

अथिया शेट्टी आणि के.एल. राहुल जवळपास ३ वर्षांपासून एकमेकांना डेट करत आहेत. गेल्या वर्षीच त्यांनी त्यांच्या नात्याविषयी सर्वाना सांगितले. खरं तर, अथियाचा भाऊ अहान शेट्टीच्या 'तडप' चित्रपटाच्या स्क्रिनिंगला राहुलही पोहोचला होता. यावेळी दोघेही पहिल्यांदाच एकत्र दिसले आणि अथिया आणि के.एल. राहुल एकमेकांना डेट करत असल्याचे समजले.