Pune International Film Festival : चित्रपट महोत्सव हे चित्रपटांचा आणि कलाकरांचा गौरव करण्यासाठी आयोजित करण्यात येतात. चित्रपट महोत्सवांच्या माध्यामातून कलाकारांचा सन्मान करण्यात येतो. असाच एक सन्मान सोहळा पुण्यात पार पडणार आहे. पुणे शहराला सांस्कृतिक वारसा लाभला आहे. याच पुण्यात आज पुणे आंतरराष्ट्रीय चित्रपट महोत्सवाची सुरूवात झाली असून अनेक चित्रपटांचा आणि कलाकारांचा सन्मान करण्यात येणार आहे.

23 व्या पुणे आंतरराष्ट्रीय चित्रपट महोत्सवाचे उद्घाटन आज सायंकाळी पाच वाजता श्री गणेश कला क्रीडा रंगमंच येथे सांस्कृतिक मंत्री आशिष शेलार यांच्या हस्ते करण्यात आले. भारतीय चित्रपटसृष्टीतील योगदानाबद्दल ज्येष्ठ अभिनेत्री शुभा खोटे आणि ज्येष्ठ अभिनेते अनुपम खेर यांना पीएफ डिस्टिंग्विश अवॉर्ड, तर ज्येष्ठ गायिका कविता कृष्णमूर्ती यांना संगीत क्षेत्रातील योगदानासाठी संगीतकार एस.डी. बर्मन पुरस्कार देऊन गौरवण्यात आले.

यावेळी आपले मत व्यक्त करताना आशिष शेलार म्हणाले, अभिनयासाठी कुठल्याही अभिनेत्याला प्रचंड मेहनत करावी लागते. आपल्या जुन्या चित्रपटात ज्येष्ठ दिग्दर्शक राज कपूर यांच्या अभिनयातून कायम संवेदनशीलता दिसून आली आहे. आज येथे प्रारंभ झालेला पुणे फिल्म फेस्टिवल हा शासनाचा अधिकृत चित्रपट महोत्सव आहे. शासनाकडून फिल्म फेस्टिवल चांगल्या प्रकारचे अर्थसहाय्य होत असते. लवकरच, मुंबईतील चित्रनगरीत चित्रपटाशी संबंधित कामासाठी 10 एकर जागा देण्यात येण्याचा निर्णय मुख्यमंत्र्यांच्या अध्यक्षतेखाली घेण्यात येणार आहे.

13 ते 20 फेब्रुवारी या महोत्सव कालावधीत आयोजित या चित्रपट महोत्सवात विविध देशी-विदेशी सुमारे 150 चित्रपट, जागतिक स्पर्धा विभागातील 14 आणि मराठी स्पर्धा विभागातील 7 चित्रपट दाखवले जाणार आहेत.