Ashish Patil: लावणी म्हणजे ‘रसरंगांचं कारंजं! शब्दलावण्य, भावलावण्य यांचा मिलाप साधत घडणारा देखणा कलाविष्कार. या आविष्काराला वेगळं रूप देत आपली संस्कृती, परंपरा जपण्याचा प्रयत्न होणे हे कौतुकास्पदच. ‘लावणी किंग’ म्हणून प्रसिद्ध असलेला लोकप्रिय कोरिओग्राफर आशिष पाटील याने महाराष्ट्राची शान असलेल्या लावणीला एक वेगळी ओळख मिळवून दिली. कलेच्या माध्यमातून रसिकांच मनोरंजन करताना नृत्यसंस्कृती जपली जावी या उद्देशाने 'सुंदरी’ अदा ताल शृंगार या नव्या शो ची संकल्पना आणून आशिष पाटीलने ती यशस्वी केली.

मुंबईत 'सुंदरी’ अदा ताल शृंगार शो ला मिळालेल्या प्रतिसादानंतर आता 'सुंदरी’ या शोचा नजराणा जुलै महिन्यात अमेरिकेत रंगणार आहे. विशेष म्हणजे प्रसिद्ध अभिनेत्री, नृत्यांगना अमृता खानविलकर आणि आशिष पाटील या दोघांच्या अदाकारीने ही नृत्य मैफिल सजणार आहे.

लोकप्रिय संगीतातून आणि तितक्याच लयबद्ध नृत्याविष्कारातून, त्यातील भावभावनांचे लोभसवाणे सादरीकरण प्रेक्षकांपर्यंत पोहचवण्याचा आशिष पाटीलचा प्रयत्न आहे. 'सुंदरी’ अदा ताल शृंगार हा अविस्मरणीय कार्यक्रम मनाचा ठाव घेतो, अशा शब्दांत रसिकांनी आणि मान्यवरांनी त्याचे कौतुक केले आहे.

परंतु, लावणीकिंग आशिष पाटीलवर काही दिवसांपूर्वी प्रवीण कलमे यांनी ‘सुंदरी’ या नावाचा ट्रेडमार्क आणि संकल्पना आशिषने चोरून स्वतःच्या नावावर बनवून नीता मुकेश अंबानी कल्चरल सेंटर (NMACC) येथे ०६ फेब्रुवारी २०२५ रोजी सादर केल्याचा आरोप करत त्याच्यावर केस दाखल केली होती.