Actress Alka Kubal on physical abused: प्रसिद्ध अभिनेत्री अलका कुबल यांनी खान्देश करिअर फेस्टिव्हलमध्ये महिलांवरील अत्याचारावर भाष्य करताना स्पष्ट शब्दांत आपले मत मांडले, अलका कुबल यावेळी म्हणाल्या, जर एक बापच आपल्या मुलीवर अत्याचार करत असेल, तर अशा बापाचा खून करायलाही मुलीने मागे पुढे बघू नयेत. त्यांच्या अशा विधानामुळे सोशल मीडियावर जोरदार चर्चा सुरु झाली आहे.

कठोर कायद्यांची गरज अधोरेखित

अलका कुबल पुढे म्हणाल्या की, भारतात महिलांवरील अत्याचार थांबवायचे असतील, तर आखाती देशांप्रमाणे कठोर कायदे लागू करावे लागतील. फक्त चर्चा न करता कारवाई झाली पाहिजे, त्यात जर एखादा बापच त्याच्या मुलीवर अत्याचार करत असेल तर अशा बापाला मुलीनेच संपवलं पाहिजे.

महिलांच्या हक्कांसाठी ठाम भूमिका

त्यांनी महिलांनी स्वतःसाठी उभं राहण्याचं आवाहन करत सांगितलं की, जर घरातच सुरक्षितता नसेल, तर समाज कोणत्या आधारावर सुरक्षितता देईल? त्यांच्या या वक्तव्यामुळे महिला सशक्तीकरणावर पुन्हा एकदा लक्ष केंद्रित झालं आहे. त्यांच्या परखड मतांवर समाजात आणि सोशल मीडियावर तीव्र प्रतिक्रिया उमटत आहेत. काही लोक त्यांना धाडसी म्हणतायत, तर काहींनी या भाषेवर आक्षेप घेत संयमाचे महत्त्व अधोरेखित केले आहे.

अलका कुबल यांच्या कामाबद्दल बोलायचे झाले तर, त्यांचे 24 एप्रिलला वजनदार हे मराठी नाटक प्रेक्षकांच्या भेटीला येणार आहे. याशिवाय अलका कुबल एका हिंदी वेब सीरिजमध्येही दिसणार आहेत. लवकरच त्या एक टेलिव्हिजन शो आणि मराठी चित्रपटांसाठीही अलका कुबल काम करत आहेत.