अभिनेत्री रिचा चड्ढा आणि अभिनेता अली फजल यांनी १६ जुलै रोजी चाहत्यांना गोड बातमी दिली आहे. अभिनेत्रीने एका गोंडस मुलीला जन्म दिला असून ते दोघेही आई- बाबा झाले आहेत. चिमुकल्या परीचं आगमन झाल्यामुळे चड्ढा आणि फजल कुटुंबीय आनंदीत आहेत. रिचा आणि अलीने काही तासांपूर्वीच इन्स्टाग्रामवर फोटो शेअर करत चाहत्यांना लेकीची पहिली झलक दाखवली आहे.

रिचा आणि अलीने इन्स्टाग्रामवर शेअर केलेल्या पोस्टमध्ये, मुलीच्या पायाचा फोटो शेअर केलेला आहे. शेअर केलेल्या फोटोला दोघांनीही कॅप्शन दिले की, "आमच्या आयुष्यातील सर्वात मोठं Collab करत एक पोस्ट शेअर करत आहोत. आम्ही खूपच धन्य झालो आहोत. आमची गोंडस परी आम्हाला कायमच कोणत्या ना कोणत्या कारणामुळे व्यस्त ठेवत आहे.. आमच्या लेकीला तुम्ही दिलेल्या प्रेमासाठी आणि आशीर्वादासाठी मन:पुर्वक आभार आहेत."

रिचा आणि अलीने शेअर केलेल्या पोस्टवर अनेक सेलिब्रिटींनी प्रेमाचा वर्षाव केलेला आहे. यामध्ये तापसी पन्नु, प्रियंका चोप्रा, अर्चना पुरण सिंह, जिम्मी शेरगिल, नील मुकेश, नीती मोहन, स्वरा भास्कर, नेहा भसीनसह अनेक सेलिब्रिटींनी रिचा आणि अलीवर प्रेमाचा वर्षाव केलेला आहे.

'फुकरे' चित्रपटाच्या सेटवर २०१२ मध्ये दोघांचीही भेट झाली होती. तेव्हा त्यांची फ्रेंडशिप झाली होती. पण त्या फ्रेंडशिपचे रुपांतर नंतर रिलेशनशिपमध्ये झाले. दरम्यान, अली फजलच्या कामाबद्दल बोलायचे तर, गेल्या काही दिवसांपासून अली फजल 'मिर्झापूर ३'मुळे चर्चेत आहे. तर रिचा चड्ढा संजय लीला भन्साळी दिग्दर्शित 'हीरामंडी' सीरीजमुळे चर्चेत आली आहे.