‘द कपिल शर्मा शो’ मुळे टीव्ही अभिनेत्री सुमोना चक्रवर्ती हिला प्रसिद्धी मिळाली आहे. या शोमुळे सुमोनाच्या फॅन्समध्ये प्रचंड वाढ झाली आहे. गेल्या काही दिवसांपूर्वी सुमोनाने शो सोडला आहे. मध्यंतरीच्या काळात सोशल मीडियावर सुमोनाला शोमधून काढून टाकण्यात आल्याची चर्चा सुरू आहे. आता त्या चर्चांवर अखेर सुमोना चक्रवर्तीने मौन सोडलं आहे. नुकत्याच दिलेल्या एका मुलाखतीत तिने याबद्दल वक्तव्य केलं आहे.

कपिल शर्मा शोबद्दल विचारलेल्या प्रश्नावर सुमोनाने ‘न्यूज १८’ला दिलेल्या मुलाखतीत सांगितलं की, "ही गोष्ट फारच विचित्र आहे. गेल्या काही दिवसांपूर्वी माझ्याबद्दल खूप चांगल्या बातम्या छापून आलेल्या होत्या. मी पत्रकाराशी बोलले होते आणि त्याला नेमकं उलटं मी सांगितलं होतं. पण दोन दिवसांनंतर दुसऱ्या मीडिया हाऊसने माझी वेगळीच बातमी छापली होती. त्यावेळी मी काहीच बोलू शकले नाही, कारण तेव्हा मी रोमानियामध्ये होते."

"मी पुन्हा एकदा सांगतेय, मी या शोचा हिस्सा जुलै २०२३ पर्यंतच होते. मी रिझाईन दिलं किंवा मला काढून टाकलं अशातलीही कोणती गोष्ट नाही. जुलैमध्ये शो संपल्यानंतर आम्ही सर्व ज्याच्या त्याच्या कामामुळे वेगवेगळे झालो. मी खतरों के खिलाडी शोमध्ये आहे. कपिल त्याच्या शोमध्ये आहे. कपिलने आणि मी आधी एकत्र काम केल्यामुळे आमच्यामध्ये कोणतीही नाराजी नाही." असं म्हणत सुमोना चक्रवर्तीने सर्व चर्चांना पुर्णविराम दिलेला आहे.

सुमोना येत्या २७ जुलैपासून टेलिकास्ट होणाऱ्या 'खतरों के खिलाडी १४' मध्येही दिसणार आहे. शोच्या शुटिंगवरून अभिनेत्री रोमानियाहून परतली आहे. तिला शोमध्ये पाहण्यासाठी चाहते उत्सुक आहेत.