बॉलिवूड विश्वातील प्रसिद्ध अभिनेत्रींमध्ये मौनी रॉयची गणना केली जाते. तिने सिरीयल, चित्रपट आणि वेबसीरीज अशा तिनही माध्यमांतून प्रेक्षकांचे निखळ मनोरंजन केले आहे. मौनी रॉयला सर्वाधिक प्रसिद्धी एकता कपूरच्या ‘नागिन’ मालिकेतून मिळाली आहे. या सिरीयलची ऑफर येण्याआधी मौनी एका गंभीर आजारामुळे त्रस्त होती. असा खुलासा अभिनेत्रीने स्वत: एका मुलाखतीमध्ये केलेला आहे.

‘मॅशेबल इंडिया’ला दिलेल्या मुलाखतीत मौनी रॉयने तिच्या हेल्थबद्दल सांगितले आहे, " 'नागिन' मालिका सुरू होण्याआधी मी आयुष्याच्या अशा टप्प्यावर होते. जिथे मला वाटलं होतं की, माझं आयुष्य आता संपलं आहे. त्यावेळी मी थोडी आजारी होते.‘झलक दिखला जा ९’नंतर माझी L-4 आणि L-5 याचा माझ्या पाठीच्या कण्याला त्रास झाला होता. त्यामुळे मला व्यवस्थित उभंही राहता येत नव्हतं."

"ज्यावेळी मला 'नागिन'ची ऑफर आली होती, तेव्हा मी खूप आजारी होते. त्यामुळे माझं वजनही खूप वाढले होते. मी दिवसाला ३० गोळ्या घ्यायचे आणि कधी कधी इंजेक्शन्सही घ्यायचे. माझ्या मणक्यामध्ये एपिड्युरल होते. ते दिवस माझ्यासाठी फार वाईट होते. मी जवळजवळ तीन महिने अंथरुणावरच होते आणि तेव्हाच मला ‘नागिन’ची ऑफर आली होती."

मौनी रॉयच्या कामाबद्दल बोलायचे तर, "ब्रह्मास्त्र", "गोल्ड" चित्रपटांमध्ये महत्वाची भूमिका साकारली आहे. तर "नागिन" आणि "देवों के देव महादेव" मालिकेतही प्रमुख भूमिका साकारली आहे.