Parbhani :

परभणी जिल्ह्यातील सेलू तालुक्यातील मोरेगाव येथे शेत जमीनच्या वादातून मोठ्या भावाने सख्ख्या लहान भावावर धारदार शस्त्राचे वार करुन खून केल्याची घटना साेमवारी रात्री घडली. मधुकर मारोतराव मगर (वय ३८, रा.मोरेगाव) असे मृताचे नाव असून राजेभाऊ उर्फ अशोक मगर यास पाेलिसांनी अटक केल्याची माहिती साम टीव्हीला दिली. (Maharashtra News)

सेलू तालुक्यातील मोरेगाव येथील मोरेश्वर मंदीरात जेवणाची पंगत चालू असताना ही घटना घडली. याप्रकरणी मृताची पत्नी अलका मधुकर मगर (वय ३१) यांनी फिर्याद दिली‌. संशयित आरोपी राजेभाऊ याने मृताच्या गळ्यावर, डाव्या पायावर, तोंडावर, छातीच्या डाव्या बाजुस चाकुने हल्ला करुन त्याचा खून केला असे फिर्यादीत म्हटले आहे.

पाेलिसांनी राजेभाऊ ऊर्फ अशोक मारोतराव मगर (वय ४३ रा. मोरेगाव) याच्यावर सेलू पोलिसांत गुन्हा दाखल करुन त्यास अटक केली आहे. जमीन परत घेतल्याच्या कारणावरून दोन्ही भावांमध्ये वाद होता, अशी प्राथमिक माहिती पाेलिसांनी दिली.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

या घटनेनंतर पोलिस उपविभागीय अधिकारी सुनील ओव्हाळ, पोलिस निरीक्षक दिपक बोरसे, सहायक पोलिस निरीक्षक संजय चव्हाण यांनी घटनास्थळी भेट दिली. या घटनेचा तपास पोलिस उपनिरीक्षक अशोक जटाळ करीत आहेत.

Edited By : Siddharth Latkar