हरियाणातील नूंह जिल्ह्यातील एका गावात महिलेसोबत अत्याचाराची गंभीर घटना समोर आलीये. यावेळी आरोपीने स्मशानभूमीमध्ये नेऊन लैंगिक अत्याचार केले आहेत. या प्रकरणामुळे परिसरात खळबळ उडाली असून पोलिसांनी तातडीने गुन्हा नोंदवत तपास सुरू केलाय.

मिळालेल्या माहितीनुसार, पिनगवां पोलीस ठाणे हद्दीतील एका गावात ही घटना घडली. पीडित महिलेने दिलेल्या तक्रारीनुसार, तिच्या बहिणीचे लग्न नूंह तालुक्यातील एका गावात झाले आहे. त्यामुळे ती बरेचदा बहिणीच्या सासरी येत-जात होती. याच दरम्यान शेजारी राहणाऱ्या एका व्यक्तीशी तिची ओळख झाली होती.

आरोपीने केला फोन

या पिडीत महिलेने दिलेल्या माहितीनुसार, संबंधित आरोपीने तिला फोन करून तिच्या बहिणीकडून काही सामान आणल्याचं सांगितलं होतं. यावेळी ते सामान देण्यासाठी तिला स्मशानभूमीजवळ येण्यास सांगितलं. आरोपीच्या बोलण्यावर विश्वास ठेवून महिला सांगितलेल्या ठिकाणी पोहोचली.

जबरदस्तीने केले लैंगिक अत्याचार

त्यानंतर आरोपीने तिला बहाण्याने जवळच असलेल्या झाडांमध्ये नेलं. त्याठिकाणी कोणीही नसल्याचा फायदा घेत त्याने तिच्यावर जबरदस्तीने अत्याचार केले. यावेळी विरोध केल्यावर आरोपीने तिच्यासोबत मारहाण केल्याचा आरोप आहे. इतकंच नाही तर आरोपीसह त्याच्या इतर साथीदारांनी तिला सुमारे दोन तास तिथेच बंधक बनवून ठेवलं होतं, असंही तक्रारीत नमूद करण्यात आले आहे.

घटनेनंतर आरोपींनी पीडितेला धमकी दिली की, जर तिने ही गोष्ट कुणाला सांगितली तर तिला जीवे मारून टाकलं जाईल. कशीबशी सुटका करून घेतल्यानंतर ती घरी पोहोचली आणि तिने संपूर्ण प्रकार आपल्या कुटुंबीयांना सांगितला.

कुटुंबियांनी तातडीने घेतली पोलिसात धाव

यानंतर कुटुंबीयांनी तातडीने पोलिसांकडे धाव घेतली. पोलिसांनी महिलेच्या तक्रारीवरून गुन्हा दाखल केला असून आरोपींचा शोध घेण्यासाठी पथकं रवाना करण्यात आली आहेत. सध्या या प्रकरणाचा अधिक तपास सुरू आहे.