लग्नाच्या ३ वर्षे होऊनही मूल होत नाही त्यामुळे तरुण आपल्या बायकोला घेऊन मांत्रिकाकडे गेला. या महिलेवर मांत्रिकानेच बलात्कार केला. तांत्रिकाने लिंबू कापण्याच्या बहाण्याने महिलेला शेतात नेले आणि तिथेच तिच्यावर त्याने बलात्कार केला. महिलेने केलेल्या तक्रारीनंतर मांत्रिकाविरोधात पोलिस ठाण्यात गुन्हा दाखल करण्यात आला आहे. आरोपी मांत्रिकाला पोलिसांनी बेड्या ठोकल्या.

मिळालेल्या माहितीनुसार, हाथरस जिल्ह्यातील २२ वर्षीय महिलेचे लग्न तीन वर्षांपूर्वी झाले होते. लग्नाला ३ वर्षे होऊन देखील मूल झाले नसल्याने ती नाराज होती. चिंतेत असलेल्या महिलेने आपल्या नणदेला याबाबत सांगितले. तिने या महिलेला नरखी येथील मुनियाखेडा गावातील रहिवासी भगत चंद्रपाल सिंह यांच्याकडून भूतबाधा करून घेण्यास सांगितले. ५ जुलै रोजी या महिलेला तिचा नवरा आणि नणंद मांत्रिकाकडे घेऊन गेले. मांत्रिकाने त्यांना १२ जुलै रोजी पुन्हा येण्यास सांगितले.

सांगितल्याप्रमाणे १२ जुलै रोजी ते तिघे मांत्रिकाला भेटण्यासाठी मुनियाखेडा गावातील मंदिरात गेले. मांत्रिकाने महिलेला शेतात लाडू पुरण्याचा आणि लिंबू कापण्याचा सल्ला दिला. पीडित महिलेचा आरोप आहे की, तिचा पती मंदिराबाहेर असताना तांत्रिकाने तिच्या नणदेला काही वस्तू आणण्यासाठी पाठवले. यानंतर मांत्रिकाने पीडितेला लाडू पुरण्याचा आणि लिंबू कापण्याचा बहाण्याने मंदिरापासून सुमारे ४०० मीटर अंतरावर असलेल्या त्याच्या खोलीजवळील शेतातील एका खड्ड्यात नेले आणि तिथे तिच्यावर बलात्कार केला.

या पीडित महिलेची नणद मूल होत नसल्याने सहा वर्षांपूर्वी मांत्रिकाकडे गेली होती. त्यानंतर ती आई झाली होती. त्यामुळे तिने पीडित महिलेला मांत्रिकाकडे जाण्याचा सल्ला दिला होता. पीडितेच्या तक्रारीवरून मांत्रिकाविरोधात गुन्हा दाखल करण्यात आला. सुरूवातीला आरोपीविरोधात गु्न्हा दाखल करण्यात आला पण वैद्यकीय तपासणीनंतर बलात्काराची पुष्टी झाल्यानंतर कलम वाढवण्यात आले. आरोपी मांत्रिकाला पोलिसांनी रविवारी सकाळी मंदिराजवळून अटक करून तुरुंगात पाठवण्यात आले.