मनोज तांबे, साम टीव्ही

विरारच्या एमबी इस्टेटमधील श्री संगम इमारतीत राहणाऱ्या महेश सोनी याने आपल्या लहान बहिणीच्या मदतीने पत्नीची हत्या केल्याची घटना घडली आहे. तिच्या डोक्यावर आणि कपाळावर धारधार हत्याराने वार केल्यामुळे तिचा जागीच मृत्यू झाला. कल्पना सोनी (३५) असे या मृत्यू झालेल्या महिलेचे नाव आहे.

आरोपी पती महेश सोनी (३८) आणि नणंद दिपाली सोनी (३५) या दोघांना बोळींज पोलिसांनी अटक केली असून 2 जानेवारी पर्यंत पोलिस कोठडी मिळाली आहे. या प्रकरणी अधिक तपास सुरू असल्याची माहिती बोळींज पोलीस ठाण्याचे वरिष्ठ पोलीस निरीक्षक प्रकाश कावळे यांनी दिली.

मयत कल्पना सोनी (३५) ही विवाहित महिला विरार पश्चिमेच्या एम बी ईस्टेट मधील संगम सोसायटीमध्ये पतीसोबत राहत होती. २०१५ मध्ये तिथे लग्न महेश सोनी याच्यासोबत झाले होते. लग्नानंतर सासरची मंडळी तिचा शारीरिक आणि मानसिक छळ करत होते. त्यामुळे त्यांच्यात वारंवार भांडणं होत असायची. शनिवारी सकाळी ९ वाजता त्यांच्यात पुन्हा भांडण झाले. यावेळी मयत कल्पनाने घर सोडून जात असल्याचे सांगत आपले स्त्रीधन परत मागितले. यावेळी झालेल्या भांडणात पती महेश सोनी (३८) आणि नणंद दिपाली सोनी (३५) या दोघांनी मिळून कल्पनाला मारहाण केली. तिच्या डोक्यावर आणि कपाळावर धारधार हत्याराने वार केले. यामुळे तिचा जागीच मृत्यू झाला

या प्रकरणी मयत कल्पनाचे मामा मनोहर सोनी यांनी दिलेल्या फिर्यादीवरून बोळींज पोलिसांनी पती महेश आणि नणंद कल्पना यांच्या विरोधात हत्येचा गुन्हा दाखल केला आहे.