उल्हासनगरमधून अंगावर काटा आणणारी घटना उघडकीस आली आहे. शहरात एका प्ले ग्रुप मध्ये शिकणाऱ्या चिमुकल्याने कविता म्हणताना टाळ्या वाजवल्या नाही म्हणून शिक्षिकेने चिमुकल्याला मारहाण केल्याचा व्हिडिओ समोर आला आहे. या प्रकरणी विठ्ठलवाडी पोलिसांनी प्ले ग्रुप ची शिक्षिका गायत्री पात्रा हिच्या विरोधात गुन्हा दाखल केला आहे.

मिळालेल्या माहितीनुसार, उल्हासनगर शहरातील कुर्ला कॅप परिसरातील एका प्ले ग्रुपमध्ये हा अडीच वर्षाचा चिमुकला शिकण्यासाठी गेला असता प्ले ग्रुपच्या शिक्षिका मुलांना कविता शिकवत होत्या. यावेळेस शिक्षिकेनेमुलांना कविता म्हणत टाळ्या वाजवायला सांगितल्या. मात्र या चिमुकल्याने काही प्रतिसाद न दिल्याने प्ले ग्रुप मधील शिक्षिका गायत्री पात्र हीने त्या चिमुकल्याच्या कानाखाली मारली.

सलग तीन वेळा या मुलाच्या कानाखाली मारण्यात आली त्यामुळे हा चिमुकला घाबरला ,हा सर्व प्रकार मोबाईल मध्ये चित्रीत झाला आहे, हा व्हिडिओ मुलाच्या पालकांना पाहिला असता त्यांनी तत्काळ विठ्ठलवाडी पोलीस ठाण्यात गायत्री पात्र या शिक्षके विरोधात तक्रार दाखल केली , त्यानंतर विठ्ठलवाडी पोलिसांनी अल्पवयीन मुलांच्या काळजी आणि संरक्षण कायद्या अंतर्गत शिक्षकेवर गुन्हा दाखल केला आहे.

दरम्यान या घटनेनंतर पालकवर्गात भीतीचे वातावरण निर्माण झाले असून पोलीस या प्रकरणी अधिक तपास करत आहेत. मात्र या शिक्षिकेला काय शिक्षा होणार हे पाहणं महत्त्वाचं ठरेल. या घटनेने पुन्हा एकदा प्रश्न निर्माण केला आहे की, आपल्या शाळा आणि प्ले ग्रुपमधील मुलांच्या सुरक्षिततेसाठी नेमक्या किती प्रमाणात दक्षता घेतली जाते?