अजय दुधाणे, साम टीव्ही प्रतिनिधी

Ulhasnagar crime News : उल्हासनगर कॅम्प क्रमांक तीन येथील शांतीनगर भागात एका युवकाची रात्री उशिरा निर्घृण हत्या करण्यात आलीय. हा युवक त्यांच्या नातेवाईकांकडे आला होता. शांतीनगर भागात असलेल्या रेमंड शोरूम च्या समोरील रस्त्यावरून हा युवक रात्री दोन वाजेच्या सुमारास अॅक्टिवा वरून जात होता. त्यावेळी त्याची अॅक्टिवा थांबवून बाचाबाची झाली, त्यानंतर गळा चिरण्यात आला. या घटनेत सदर युवकाचा जागीच मृत्यू झाला. मृत व्यक्तीचे नाव पंकज निकम असे आहे.

पंकज यांची हत्या कोणत्या कारणातून झाली हे अजून समोर आलेले नाही. या हत्येमागील आरोपी कोण आहेत तेही अजून समजू शकले नाह. या प्रकरणी मध्यवर्ती पोलीस ठाण्यात गुन्हा दाखल करण्यात येत आहे. पोलीस उपायुक्त सचिन गोरे आणि सहाय्यक पोलीस आयुक्त अमोल कोळी यांनी घटनास्थळाची पाहणी केली.

मिळालेल्या माहितीनुसार, मृत पंकज हा जागरण-गोंधळाच्या कार्यक्रमासाठी पाच दिवसांपूर्वी उल्हासनगरमधील आपल्या पाहुण्याकडे आला होता. पण रात्री दोन वाजता उल्हासनगर -कल्याण रोडजवळ हत्या झाली. पंकज याचं दोन अडीच वर्षांपूर्वी लग्न झाले होते, त्याला एक मुलगा आहे.पंकज याच्या हत्येनं परिसरात एकच खळबळ उडाली. पोलिसांनी तपास सुरू केलाय, सीसीटीव्ही फुटेजच्या आधावर पोलीस आरोपाचा शोध घेत आहेत.

चोरीची दुचाकी घेऊन फिरले, अन पोलिसांना सापडले!

उल्हासनगरमध्ये काही संशयित इसम चोरीची बाईक घेऊन फिरत असल्याची माहिती गुन्हे शाखेचे कर्मचारी पिंट्या थोरवे यांना मिळाली होती. त्यानुसार गुन्हे शाखेनं अमरडाय कंपनीकडे जाणाऱ्या रस्त्यावरून रवी जैस्वार, आशिष गुप्ता आणि बाबू रिझवी या तिघांना ताब्यात घेतलं. त्यांच्याकडे असलेली ज्युपिटर स्कुटर ही मध्यवर्ती पोलीस ठाण्याच्या हद्दीतून चोरलेली असल्याचं निष्पन्न होताच त्यांना अटक करण्यात आली. त्यांच्या चौकशीत त्यांनीय दुचाकीसह आणखी ६ दुचाकी चोरल्याची कबुली दिली. या सर्व गाड्या गुन्हे शाखेनं जप्त केल्या. केवळ एका माहितीच्या आधारे संपूर्ण बाईक चोरीचं रॅकेट गुन्हे शाखेनं पकडलं असून गुन्हे शाखेचे पिंट्या थोरवे यांच्या तत्पररेचं यानंतर कौतुक होतंय.