तामिळनाडूमध्ये एका महिने आपल्या ५ महिन्यांच्या बाळाची हत्या केली. तामिळनाडूच्या कृष्णागिरी जिल्ह्यातील केलामंगलम येथे २ नोव्हेंबरला ही घटना घडली होती. बाळाच्या वडिलांना आपल्या मुलाचा मृत्यू संशयास्पद झाल्याचे वाटले त्यामुळे त्यांनी पोलिसात तक्रार दाखल केली. चिमुकल्याच्या मृत्यू प्रकरणाचा तपास करताना पोलिसही चक्रावले. कारण आईनेच आपल्या समलिंगी पार्टनरच्या मदतीने बाळाला संपवल्याचे तपासातून उघड झाले. या प्रकरणी दोघींना पोलिसांनी बेड्या ठोकल्या आहेत.

पोलिसांनी अटक केलेल्या दोन्ही महिला केलीमंगलमजवळील चिन्नट्टी गावात राहतात. एस भारती आणि तिची समलैंगिक पार्टनर सुमित्रा (२२ वर्षे) अशी आरोपी महिलेंची नावं आहेत. पोलिसांनी सांगितले की, भारतीचे लग्न सुरेश (३८ वर्षे) यांच्याशी झाले होते. त्यांना ५ आणि ३ वर्षांच्या दोन मुली आहेत आणि ५ महिन्यांपूर्वी त्यांना मुलगा झाला होता.

भारतीचे सुमित्रासोबत प्रेमसंबंध होते. सुरेशला भारती आणि सुमित्रा यांच्यामध्ये समलिंगी संबंध असल्याचे कळाले तेव्हा त्याला धक्का बसला. यावरून भारती आणि सुरेश यांच्यात भांडण झाले. त्यामुळे त्याच्या धाकट्या बहिणीला मुलांची जबाबदारी घ्यावी लागली. काही दिवसांपूर्वी सुरेशसोबत झालेल्या भांडणानंतर भारती कुंथुमारनपल्ली गावात तिच्या आईच्या घरी निघून गेली. पण तिच्या आईने तिची समजून काढून तिला परत सासरी पाठवले.

सुरेश आणि कुटुंबातील इतर सदस्य कामावर गेले असता भारतीने आपल्या ५ महिन्यांच्या बाळाची हत्या केली. कामावरून नवरा घरी आल्यानंतर भारतीने त्याला सांगितले की बाळाचा मृत्यू गुदमरून झाला. कुटुंबातील सदस्यांनी तिच्यावर विश्वास ठेवला आणि बाळावर अंत्यसंस्कार करत मृतदेह पुरला. पण बाळाच्या वडिलांना बाळासोबत काही तरी चुकीचे घडले असावे असा संशय होता. मंगळवारी सुरेशने पोलिस ठाण्यात धाव घेत मुलाचा संशयास्पद मृत्यू झाल्याचे सांगितले.

पोलिसांनी या प्रकरणाचा तपास सुरू केला. या तपासातून भारतीने सुमित्राच्या मदतीने आपल्या बाळाची हत्या केली असल्याचे उघड झाले. दोघींनी बाळाच्या हत्येचा आधीच कट रचला होता. त्यानंतर पोलिसांनी दोघांना अटक केली. भारतीने सुमित्राच्या मोबाइलवर एक मेसेज पाठवत हत्येची कबुली दिली आणि बाळाच्या मृतदेहासोबतचा फोटो पाठवला होता. पोलिसांना आरोपींच्या मोबाइलमध्ये भारती आणि सुमित्रा यांचे सोबतचे प्रायव्हेट फोटो आणि व्हिडीओ सापडले आहेत. पोलिसांनी अटकेनंतर दोघांना कोर्टात हजर करण्यात आले होते. कोर्टाने त्यांची रवानगी न्यायालयीन कोठडीत केली.