- चेतन व्यास

Wardha :

शेतातील ओलित आटोपल्यावर मातीने माखलेले हातपाय धुण्यासाठी कॅनलवर गेलेल्या मुलाचा पाय घसरून तो कॅनलमध्ये पडला. त्याला वाचविण्याकरिता वडिलांनी कॅनलमध्ये उडी घेतली. मुलाल वाचविण्याच्या प्रयत्नात वडिलही बुडाले. हृदयाचा थरकाप वाढविणारी घटना वर्धा जिल्ह्यातील आर्वी तालुक्यातील सालफळ येथे बुधवारी घडली. या घटनेत अरविंद मधुकर कोहळे (वय ५५) व चेतन अरविंद कोहळे (वय १८) या बाप-लेकाचा मृत्यू झाल्याची माहिती पाेलिसांनी दिली. (Maharashtra News)

सालफळ येथील अरविंद कोहळे व चेतन कोहळे हे बापलेक कॅनल जवळील शेतात पाण्याचे ओलित करीत होते. ओलीत संपल्यावर मुलगा चेतन हा पाय धुण्यासाठी कॅनलवर गेला. यावेळी तो पाय घसरून कॅनलमध्ये पडला. त्याला वाचविण्यासाठी वडील अरविंद कोहळे हे गेले. परंतु ते देखील पाण्यात बुडाले. या घटनेत दाेघांचा दुर्दैवी मृत्यू झाला. रात्री उशिरापर्यंत दाेघे घरी न आल्याने पन्नास साठ ग्रामस्थ शेताच्या रस्त्याने निघाले असता त्यांना बैल एकटेच येताना दिसले.

त्यांनी शेताजवळ जाऊन पाहिले असता त्या दोघांच्याही चपला कॅनलच्या जवळ दिसल्या. त्यानंतर गावकऱ्यांनी दोघांचा शोध सुरू केला. रात्री अकरा वाजता त्यांना अरविंद यांचा म्रुतदेह सापडला. आज सकाळी सहा वाजता ग्रामस्थांना चेतनचा मृतदेह सापडला.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

पुलगाव पोलिसांनी दोन्ही मृतदेह पुलगाव येथील सामान्य रुग्णालयात शवविच्छेदनाकरिता नेले. या घटनेने विरूळ परिसरात सर्वत्र शोककळा पसरली. पुढील तपास पुलगाव पोलिस करीत आहेत.

Edited By : Siddharth Latkar