- संजय राठोड

Yavatmal Crime News :

गौण खनिज तस्करीला पायबंद घालण्यासाठी गेलेल्या तलाठ्यावर रेती व माती माफियांनी जीवघेणा हल्ला केला. या हल्ल्यात यवतमाळ जिल्ह्यातील तलाठी मोडके हे गंभीर जखमी झाले आहेत. तसेच महागाव तहसील कार्यालयाचे वाहन चालक आडे हे किरकोळ जखमी झाले आहेत. पाेलिस या घटनेचा कसून तपास करीत आहे. (Maharashtra News)

यवतमाळचे जिल्हाधिकारी पंकज आशिया (pankaj ashiya ias) यांनी महागाव तहसील कार्यालयात विभागनिहाय आढावा बैठक घेतली. या बैठकीत फुलसावंगी परिसरात प्रचंड प्रमाणात रेती आणि मातीचे अवैध उत्खनन करण्यात येत आहे. ही गौण खनिज तस्करी रोखण्याचे आदेश जिल्हाधिकारी यांनी दिले होते.

या आदेशाची अंमलबजावणी करण्यासाठी महागाव तहसील कार्यालयाचे रात्र गस्ती पथक फुलसावंगी (fulsawangi) परिसरात पाहणी करीत असताना काळी टेंभी येथे मातीचे अवैध उत्खनन व वाहतूक करण्यात येत असल्याचे पथकाच्या निदर्शनास आले. हे पथक कारवाई करण्यासाठी सरसावले असता दहा ते पंधरा जणांनी तलाठी मोडके यांच्यावर प्राण घातक हल्ला चढविला. तसेच तहसीलच्या वाहनाचे चालक आडे यांनाही मारहाण केली.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

त्यानंतर मारहाण करणारे पळून गेले. गंभीर जखमी झालेल्या अवस्थेतच तलाठी मोडके हे पोलीस ठाण्यात तक्रार देण्यासाठी गेले. त्यानंतर त्यांना उपचारार्थ रुग्णालयात नेण्यात आले. या घटनेचा तपास पाेलीस करीत आहेत.

Edited By : Siddharth Latkar