सचिन जाधव, पुणे|ता. २३ डिसेंबर २०२३

Pune Crime News:

पर्वती टेकडीवर साडेतीन वर्षांपूर्वी झालेल्या एका महिलेच्या खुनाचा छडा लावण्यास पर्वती पोलिसांना अखेर यश आले आहे. २०२० मध्ये आर्थिक वादातून महिलेचा खून केल्याचे उघड झाले आहे. या प्रकरणी पर्वती पोलिसांकडून आरोपीला अटक करण्यात आली आहे. (Crime News In Marathi)

काय आहे प्रकरण?

१७ ऑगस्ट २०२० रोजी पर्वती टेकडीवरून (Pune) तळजाईकडे जाणाऱ्या रस्त्यावर एका महिलेचा मृतदेह कुजलेल्या अवस्थेत सापडला होता. याबाबत पर्वती पोलिसांनी अकस्मात मृत्यूची नोंद करून तपास सुरू केला होता. मात्र महिलेची ओळख पटली नसल्याने तपासात अडचणी येत होत्या.

मृत महिलेच्या हातावर सुरेखा असे नाव गोंदलेले होते. याच माहितीच्या आधारे पोलिसांनी ऑगस्ट २०२० मध्ये बेपत्ता झालेल्या महिलांची माहिती घेतली. यामध्ये रोहन चव्हाण याने खेड शिवापूर पोलिस चौकीत त्याची आई बेपत्ता झाल्याची तक्रार नोंदविल्याचे समोर आले.

. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

पोलिसांनी केलेल्या अधिक तपासात आर्थिक वादातून या महिलेचा खून झाल्याची माहिती समोर आली. सुरेखा संतोष चव्हाण (वय ३६, रा. खेड शिवापूर, ता. हवेली) असे खून झालेल्या महिलेचे नाव आहे. या प्रकरणी सागर दादाहरी साठे (वय २६, रा. सुतारदरा, कोथरूड, मूळ रा. पाटील इस्टेट) याला साडेतीन वर्षानंतर अटक केली आहे. पर्वती पोलिसांच्या या धडाकेबाज कामगिरीचे सर्वत्र कौतुक होत आहे. (Latest Marathi News)