सागर आव्हाड, पुणे|ता. ९ मे २०२४

पुणे शहरातील गुन्हेगारी दिवसेंदिवस वाढताना दिसत आहे. शहरात खून, मारामाऱ्या, तोडफोडीच्या घटना वारंवार समोर येत आहेत. असाच एक धक्कादायक प्रकार शहरातील कोंढवा परिसरातून समोर आला असून किरकोळ वादातून एकावर तलवारीने हल्ला झाल्याची घटना घडली आहे.

याबाबत सविस्तर माहिती अशी की, किरकोळ वादातून पानटपरी चालकावर तलवारीने हल्ला केल्याची धक्कादायक घटना पुण्यातील कोंढवा परिसरात घडली. याप्रकरणी धर्मेंद्र गुप्ता यांनी कोंढवा पोलीस ठाण्यात तक्रार दाखल केली असून ३ जणांना अटक करण्यात आली आहे.

मिळालेल्या माहितीनुसार, धर्मेंद्र गुप्ता हे त्यांच्या पानाच्या दुकानात बसले होते. अचानक ३ अनोळखी व्यक्तींनी धर्मेंद्र यांच्या दुकानाजवळ येऊन त्यांच्या टपरीवरील सामान खाली फेकून दिले. तसेच त्यातील एकाने त्याच्या जवळील कोयत्याने फिर्यादी गुप्ता यांच्यावर वार केले. या धक्कादायक घटनेचे सीसीटीव्ही फुटेज सध्या समोर आले आहे. पोलिसांनी तात्काळ कारवाई करत तिघांना अटक केली आहे.

फोटो व्हायरल करण्याची धमकी देत अत्याचार..

दरम्यान, फोटो व्हायरल करण्याची धमकी देत अल्पवयीन मुलीवर लैंगिक अत्याचार केल्याची धक्कादायक घटना उघडकीस आली आहे. हा धक्कादायक प्रकार लोणीकंद परिसरात सात मार्च ते चार एप्रिल दरम्यान घडला. अभि कांबळे याच्यावर पोक्सो कायद्यांतर्गत गुन्हा दाखल करण्यात आला आहे. पोलीस अधिक तपास करत आहेत.