पिंपरी चिंचवडमध्ये एक महिला आणि तिच्या बॉयफ्रेंडची दगडाने ठेचून हत्या करण्यात आली होती. पिंपरी-चिंचवडमधील देहू रोडवरील तळवडेमध्ये ही भयंकर घटना घडली होती. या प्रकरणाचा तपास करत असताना धक्कादायक माहिती समोर आली आहे. या महिलेच्या पतीनेच तिची आणि तिच्या बॉयफ्रेंडची हत्या केली. अनैतिक संबंधातून ही घटना घडली. या महिलेच्या नवऱ्याने तिला आणि तिच्या बॉयफ्रेंडला नको त्या अवस्थेत पाहिले होते. रागाच्या भरात त्याने रस्त्यावरील दगडाने दोघांची ठेचून हत्या केली.

मिळालेल्या माहितीनुसार, जगन्नाथ पुंडलिक सरोदे (वय ५६ वर्षे) आणि मंगला सूरज टेंबरे (वय ३० वर्षे) अशी हत्या करण्यात आलेल्या दोघांची नावं आहेत. दत्तात्रय लक्ष्मण साबळेने (वय ४९ वर्षे) या दोघांची हत्या केली. दत्तात्रय साबळे हा मंगलाचा दुसरा नवरा होता. मंगलाचे जगन्नाथ सरोदेसोबत अनैतिक संबंध होते. जगन्नाथ सरोदे हा मजुरीचे काम करत होता. तर महिलेचा नवरा दत्तात्रय साबळे हा लेबर कॉन्ट्रॅक्टर आहे. जगन्नाथ आणि मंगलाच्या प्रेमप्रकरणाविषयी दत्तात्रयला कळाले होते.

जगन्नाथ सरोदे आणि मंगला टेंबरे या दोघांना दत्तात्रयने नको त्या अवस्थेत पाहिले. त्यामुळे संतप्त झालेल्या दत्तात्रयने सिमेंटच्या ब्लॉकने ठेचून दोघांची निर्घृण हत्या केली. मध्य रात्री एक ते दोन वाजताच्या सुमारास ही घटना घडली होती. हत्या केल्यानंतर आरोपी दत्तात्रय फरार झाला होता. देहूरोड पोलिसांनी त्याला अटक केली आहे. पोलिस या प्रकरणाचा पुढील तपास करत आहे.

पोलिसांनी दिलेल्या माहितीनुसार, मंगला साबळेचा दत्तात्रयसोबतचा दुसरा विवाह होता. तिचे आधी लग्न झाले होते. पहिल्या नवऱ्यापासून तिला दोन मुलं होती. पण पहिल्या नवऱ्याच्या मृत्यूनंतर तिने दत्तात्रयसोबत दुसरे लग्न केले होते. पण तिचे जगन्नाथ सरोदे यांच्यासोबत विवाहबाह्यसंबंध होते. दोघेही एकाच परिसरात राहत होते. त्यांच्या नेहमी भेटीगाठी सुरू होत्या. मंगळवारी रात्री मंगलाच्या नवऱ्याने तिला आणि तिच्या बॉयफ्रेंडला एकत्र नको त्या अवस्थेत पाहिले. त्यानंतर दत्तात्रयने दोघांना संपवलं.