पुणे जिल्ह्यातील पिंपरी चिंचवडमधील वाकड येथील फिनिक्स मिलेनियम मॉलमध्ये काही दिवसांपूर्वी एक संतापजनक घटना घडली. मॉलमधील सुरक्षा रक्षक महिलेवर मनोज धोंडीराम कदम या आयटी कर्मचाऱ्याने लैंगिक अत्याचाराचा प्रयत्न केला. प्रोमोशनची भूलथाप देत त्यानं महिलेवर जबरदस्ती केली. या प्रकरणी महिलेनं वाकड पोलीस ठाण्यात तक्रार दाखल केली. त्यानुसार पोलिसांनी या नराधमाच्या मुसक्या आवळल्या आहेत.

फिनिक्स मिलेनियम मॉलमध्ये महिला खासगी कंपनीत सुरक्षा रक्षक या पदावर कार्यरत होती. तर, मनोज धोंडीराम कदम असे आरोपीचे नाव असून मॉलच्या मॅनेजर ऑपरेशन पदावर कार्यरत होता. पीडित महिलेनं तक्रारीत म्हटल्यानुसार, पीडित महिला आणि आरोपीची मॉलमध्येच ओळख झाली. मात्र, नंतर आरोपीनं महिलेसोबत अश्लील वर्तन केले. शिवाय पीडितेला त्याने एक ऑफर दिली. 'तुला कोणती पोस्टिंग हवी आहे, मला सांग', असं म्हणत त्यानं महिलेसोबत अश्लील वर्तवणुक करून बलात्कार करण्याचा प्रयत्न केला.

महिलेच्या इच्छेविरोधात लैंगिक अत्याचार केला. या प्रकरणी पीडित महिलेनं वाकड पोलीस ठाण्यात धाव घेतली. घडलेली सगळी हकीकत पोलिसांना सांगितली. या प्रकरणी पीडित महिलेच्या तक्रारीवरून पोलिसांनी चौकशीला सुरुवात केली. तसेच आरोपी कर्मचारी कदम यांच्याविरोधात वाकड पोलीस ठाण्यात गुन्हा दाखल केला.

गुन्हा दाखल केल्याच्या काही दिवसातच पोलिसांनी आरोपी कदम याला बेड्या ठोकल्या आहेत. त्याच्यावर वाकड पोलिसांनी भारतीय न्याय संहिता कलम 74, 351 (2), 351 (3) कलमानुसार गुन्हा दाखल केला आहे. अशी माहिती वाकड विभागाचे पोलीस आयुक्त सुनील कुराडे यांनी दिलेली आहे. दरम्यान या घटनेने परिसरात भीतीचे वातावरण निर्माण झाले आहे.