- अमर घटारे

पुण्यातील कार अपघाताची घटना संपूर्ण देशभर गाजत असतानाच अमरावती शहरातील गाडगे नगर पोलिस ठाण्याच्या हद्दीतील संमती कॉलनी परिसरात एका भरधाव कार चालकाने भर दिवसा एका व्यक्तीला जोरदार धडक देऊन पलायन केल्याचे समाेर आले आहे. या घटनेतील दुचाकीस्वाराचा नुकताच मृत्यू झाला आहे. दरम्यान घटनेस 23 दिवस झाले तरी अद्याप पाेलिसांना कार चालकाचा शाेध लागला नसल्याची माहिती मृताच्या नातेवाईकांनी साम टीव्हीशी बाेलताना दिली.

अमरावती शहरातील किशोर नगर येथील रहिवासी भीमसेन वाहने हे कठोरा रोडवरील संमती कॉलनीतून आपल्या दुचाकी वाहनाने जात असताना एका भरधाव कारने त्यांना उडविले. या अपघातानंतर कारमधील युवक कारच्या बाहेर आले. त्यांनी दुचाकीस्वाराला रस्त्यावरच साेडून तेथून पलायन केले.

याबाबत दुचाकीस्वार भीमसेन यांचा मूलगा रोशन वाहने यांनी साम टीव्हीशी बाेलताना माझ्या वडिलांचा अपघात झाल्यानंतर कार चालकाने त्यांना रुग्णालयात दाखल न करता तेथून पळ काढला हे आम्हांला तेथील रहिवाशांच्या सीसीटीव्ही फुटेजमध्ये दिसून आले. या अपघाताची माहिती नागरिकांकडून आम्हांला मिळाली. माझ्या वडिलांना नागरिकांनी रुग्णालयात दाखल केले मात्र त्यांच्या डोक्याला गंभीर इजा झाल्याने त्यांचा 16 मे रोजी मृत्यू झाला.

ही संपूर्ण घटना सीसीटीव्ही कॅमेरात कैद झाली. या घटनेची तक्रार गाडगे नगर पोलिस ठाण्यात देण्यात आलेली आहे. आज 23 दिवसानंतरही पोलिसांना अद्याप आरोपींना शाेधता आलेली नाही. त्या परिसरात खूप सीसीटीव्ही कॅमेरा आहेत. ते तपासून आराेपी सापडू शकतील. पाेलिसांनी तात्काळ आराेपींना अटक करावी अशी मागणी वाहने कुटुंबीयांनी केली.

Edited By : Siddharth Latkar