भरत मोहळकर (साम टीव्ही)

Nashik Crime : एमबीए झालेल्या महिलेने चक्क बाळाची चोरी केल्याची घटना घडली आहे. बाळ चोरी केलेल्या सपना मराठे या महिलेला नाशिक पोलिसांनी अटक केली आणि चौकशी दरम्यान चक्रावणारी माहिती समोर आली आहे.. नाशिकमध्ये नेमकं काय घडलं आणि महिलेने बाळाची चोरी का केली? त्यावरचा हा स्पेशल रिपोर्ट

देशभरात नवजात बाळांच्या चोरीच्या घटना वारंवार घडतात. अशीच एक घटना नाशिकच्या जिल्हा रुग्णालयात घडली. सटाण्याच्या सुमन खान या महिलेचं सीजर झालं आणि तिने एका गोंडस बाळाला जन्म दिला.. मात्र हेच बाळ चोरीला गेलं आणि एकच खळबळ उडाली. पोटचा गोळा चोरीला गेला म्हणून चिमुकल्याच्या आईने हंबरडा फोडला. या प्रकरणी पोलीसात तक्रार देण्यात आली आणि पोलिसांनी तपासाची चक्रं वेगाने फिरवून नवजात बालकाला अवघ्या १२ तासात शोधून आईच्या कुशीत परत दिलं. मात्र चौकशीदरम्यान बाळाची चोरी केलेल्या सपना मराठे या महिलेने बाळाची चोरी का केली? याचं कारण सांगितलं आणि कारण ऐकून पोलिसही चक्रावून गेले.

वरिष्ठ पोलीस निरीक्षक मधुकर कड यांनी दिलेल्या माहितीनुसार, सपना मराठे ही एमबीए झालेली उच्चशिक्षित महिला आहे. तिचा सलग दोन वेळा गर्भपात झाला. त्यानंतर मूल होत नसल्याने सपनाने गरोदर असल्याचा बनाव केला. त्यानंतर तब्बल ९ महिने घरापासून लांब राहिली आणि २ दिवसांपूर्वी या महिलेने प्रस्तुती झाल्याचं घरी सांगितलं.. मात्र सपनाच्या बापाला संशय आला आणि सपनाचं बिंग फुटलं.

नाशिकच्या जिल्हा रुग्णालयातून यापूर्वीही अशा घटना घडल्या आहेत. त्यामुळे रुग्णालय प्रशासनाने अशा घटना रोखण्यासाठी ठोस पावलं उचलण्याची गरज असल्याचे म्हटले जात आहे.