नाशिक : पुणे येथील वैष्णवी हगवणे आत्महत्या प्रकरण ताजे असताना नाशिकमध्ये देखील गंगापूर रोड येथे भक्ती गुजराती या महिलेनं सासरच्या जाचाला कंटाळून आत्महत्या केल्याची घटना घडली. या प्रकरणी नाशिक पोलिसांनी गुन्ह्यातील तिघही आरोपींना गुजरात येथून अटक केली आहे. भक्ती गुजराती तिचे पती अथर्व गुजराती, सासरे योगेश गुजराती, सासू मधुरा गुजराथी या अटक केलेल्या तिघांची नावं असून या तिघांना न्यायालयात हजर केलं असता दोन दिवसांची पोलीस कोठडी देण्यात आली आहे. गंगापूर पोलीस यासंदर्भात पुढील तपास करत असून या तिघांना नाशिकच्या क्राईम ब्रँचकडून अटक करत गंगापूर पोलिसांच्या ताब्यात देण्यात आलं आहे.

नेमकी घटना काय?

नाशिकच्या गंगापूर परिसरात एका विवाहितेनं आत्महत्या केली आहे. सासरच्या त्रासाला कंटाळून विवाहितेनं राहत्या घरीच गळफास घेऊन जीवन प्रवास थांबवला. या घटनेची माहिती मिळताच पोलिसांनी पती आणि सासरच्या मंडळींविरोधात गु्न्हा दाखल केला.

आत्महत्येची घटना नाशिकच्या गंगापूर रोडवरील उच्चभ्रू वसाहतीत घडली आहे. भक्ती अथर्व गुजराथी (वय ३७) असं आत्महत्या केलेल्या महिलेचं नाव आहे. भक्ती यांचा अथर्व यांच्याशी ७ वर्षांपूर्वी प्रेम विवाह झाला होता. त्यांना ५ वर्षांचा एक मुलगा देखील आहे. लग्नानंतर सासरच्या लोकांकडून भक्ती यांचा शारीरिक आणि मानसिक छळ केला जात होता, असा आरोप त्यांच्या वडिलांनी केला.

सासरी त्रास दिला जात असल्यानं भक्तीच्या कुटुंबियांनी तिला माहेरी आणलं होतं. पण अथर्वनं तिला पुन्हा सासरी नेलं. पण सासरच्या लोकांकडून सुरु असलेला त्रास कायम राहिला. या जाचाला कंटाळून भक्तीनं राहत्या घरात गळफास घेऊन आयुष्याचा शेवट केला. या घटनेनंतर भक्तीच्या आई, वडिलांनी गुजराथी कुटुंबाविरोधात पोलीस तक्रार नोंदवली. अथर्वसह त्याच्या कुटुंबावर कठोर कारवाईची मागणी त्यांनी केली आहे.