सुशील थोरात, साम प्रतिनिधी

चेष्टा केल्याने एकाने आपल्याच मित्रावर कात्रीने हल्ला करत त्याचा खून केल्याची घटना अहिल्यानगर शहरातील मुकुंदनगर परिसरात घडलीय. मित्रावर कात्रीने हल्ला केल्याची घटना शुक्रवारी घडली होती. शुक्रवारच्या दिवशी दोन मित्र मेडिकलमध्ये चेष्टा करत उभे होते. परंतु विनोद केल्याचा राग अनावर झाला आणि एका मित्राने चेष्टा करणाऱ्यावर कात्रीने हल्ला चढवला. या हल्ल्यामुळे मित्र गंभीर जखमी झाला होता.

मिळालेल्या माहितीनुसार, शमसुद्दीन खान असे हल्ला करणाऱ्या मुलाचे नाव आहे तर हल्ल्यात मृत पावलेल्या मुलाचे नाव जिशान खान आहे. शमसुद्दीन खान आणि जिशान खान हे दोघेही शहरातील मुकुंदनगर परिसरातील मेडिकलमध्ये चेष्टा करत उभे होते. याच चेष्टेचा राग शमसुद्दीन खानला आला त्याने आपला मित्र जीशान खानवर कात्रीने हल्ला चढवला होता. शुक्रवारी रात्री घडलेल्या या घटनेनंतर जखमी जिशान खान याला शहरातील एका खासगी रुग्णालयात उपचारासाठी दाखल करण्यात आले होते. मात्र आज सकाळी उपचारादरम्यान जिशान खानचा मृत्यू झाला.

शुक्रवारी रात्री एका मेडिकल दुकानात मस्करी करीत असतांना झालेल्या या भांडणाचा सीसीटीव्ही व्हिडीओ समोर आला आहे. भिंगार कॅम्प पोलीस ठाण्यात याबाबत खुनाचा गुन्हा दाखल करण्यात आला आहे. तर हल्ला करणारा शमसुद्दीन खान हा पसार झाला असून पोलीस त्याचा शोध घेत आहे.